Битеуроссей Халкъ фронт (ОНФ) бизни къыралда регионланы барында да ПЦР-тестни багъасы неллай бир болгъанын тинтип чыкъгъанды. Аны эсеплерине кёре бу жумушну багъасы иги да бийик болгъаны кёрюнеди. Аны юсюнден РФ-ни Президенти правительствону келечилери бла бардыргъан кенгешде айтхан эдиле, дегендиле ОНФ-ни Къабарты-Малкъарда бёлюмюнде.

«Артыкъ къолайлары болмагъан Ингушетия, Хакасия, Псков область дегенча аллай регионлада быллай тестлени багъасы 2,5 минг сомдан окъуна озгъанын билебиз. Биз соргъан 22 минг адамдан 37 проценти аны хакъ тёлеп бергенбиз дегендиле. Монополиялагъа къажау федерал служба кемчилик болгъанын тохташдырса, ол багъаланы азайтыргъа боллукъ эди», - дегенди ОНФ-ни Исполкомуну башчысы Михаил Кузнецов.

Бизни республиканы юсюнден айтханда, коронавирусха этилген ПЦР-тестни багъасы 1,3-1,8 минг сом болгъанын кёргюзтгендиле ОНФ-ни тинтиулери. Ол кеси да эсеплерин бир сутканы ичинде билдирген аллайланы. ОМС бла этилсе уа, ол 800 сомдан артыкъ турлукъ тюйюлдю. Хакъ тёлеп ишлеген лабораториялада уа ол бютюнда багъа келирге боллукъду. Алай а артыкъ 500 сом бу тестни берген кимни да хуржунун тешерик тюйюлдю. Аны бир ненча кере берирге тюшгенлени уа – бютюнда.

«Сорууну бардыргъанда, ПЦР-тестни берирге кереклиси бла адамла неллай бир тюбешгенлерин, ол алай нек болгъанын да кёргенбиз. Сёз ючюн, ючден бири коронавирусха жукъгъан ишеклик бла этгендиле аны, бешден бири уа коллегалары, жууукълары неда танышлары ауругъанларындан сора. Беш проценти - тыш къыраллагъа чыгъарча, он проценти уа – болжаллы QR-кодну алырча. Къалгъанлары уа бу тестни бир да бермегендиле», - дегенди ОНФ-ни регионда штабыны келечиси Евгений Бакаев.

Адамланы 44 проценти ПЦР-тестни жаланда бир кере бергендиле, 25 проценти – эки, 11 проценти – юч, 8 проценти – тёрт, он проценти уа – андан да кёп кере. Кёбюсю иели клиникалагъа баргъанлары себепли аны ючюн хакъ тёлегендиле. Евгений Бакаев оюм этгеннге кёре, бу жумушну багъасы учузуракъ болса, адамла аны азыракъ сансыз этерик эдиле. ОНФ ол умутда ФАС-ха сёлешип, мониторингни эсеплерине кёре тинтиу бардырсагъыз эди деп тилерикди эмда бу жумушну тамамлау бла кюрешгенлеге багъаланы азайтырча бир амал табаргъа чакъырлыкъды.

Омарланы Мурат хазырлагъанды.