КъМР-ни Башчысы Казбек Коков Россей Федерацияны Правительствосуну Председателини орунбасары Марат Хуснуллинни башчылыгъында бардырылгъан РФ-де Регионланы айнытыу правительстволу комиссияны жыйылыууну президиумуна къатышханды, деп билдиргендиле республиканы оноучусуну пресс-службасындан.
Тюбешиуню ача, Марат Хуснуллин тийишли законопроектни Къырал думаны депутатлары ючюнчю окъулууунда къабыл этгенлерин билдиргенди, анда юридический лицолагъа ёнкюч ахчала бериуню тизмеси белгиленнгенди. Ырысхыла Миллет фонддан алынып, коммунал инфраструктураны айнытыргъа, къырал эм муниципал предприятиялагъа берилликдиле.
Вице-премьер айтханнга кёре, башда сагъынылгъан жумушлагъа деп 150 миллиард сом белгиленнгенди. Аны бла байламлы Правительство жууукъ заманда право бла байламлы битеу керекли къагъытланы жарашдырлыкъды. Регионланы оноучуларына уа къысха заманда тийишли заявкаланы хазыр этерге кереклиси айтылгъанды.
Жыйылыуда дагъыда 2021-2022 жыллада юйлеге жылыу бериу къалай баргъанына къаралгъанды. Жангы жыл эм Рождество бла байламлы байрамла жууукълаша келгенлери себепли, вице-премьер регионланы башчыларына жашау коммунал мюлкде жумушла чырмаусуз тамамланылыргъа кереклисин эсгертгенди.
Ол жашау-коммунал мюлкде болгъан тюрлениулени юслеринден да билдиргенди. Ала адамлагъа таплыкъгъа эм жашау фондха къыйматлы оноу этерча деп бардырыладыла, деп эсгертгенди.
Юйледе жылыу бериу кезиу къалай ётдюрюлгенини юсюнден РФ-ни къурулуш эм жашау-коммунал мюлк министри Ирек Файзуллин доклад этгенди. Ол билдиргеннге кёре, къыралны битеу регионларында юйлеге жылыу бериу кезиу тийишлисича бардырылады, электроэнергетика бла эм коммунал иш бла байламлы битеу жууаплы службала тохташдырылгъан мардалагъа кёре ишлейдиле.
Субъектледе бу иш къалай баргъаныны юсюнден Казбек Коков бла Липецк областьны губернатору Игорь Артамонов айтхандыла.
Къабарты-Малкъарда, республиканы Башчысыны буюруу бла юйлеге отлукъ берген кезиу бир кесек алгъаракъ, 30 сентябрьде, башланнган эди.
2021-2022 жыллада кюз эм къыш кезиулеге деп жарашдырылгъан хазырлыкъны паспортуна кёре, жашау журт эм коммунал-мюлк комплексни предприятиялары комиссиялы къарауладан ётгендиле эм ишге хазыр болгъандыла.