Иш юсюнде ачып, къыяу тапханладан экеуленнге Социал страхованияны фондуну регион бёлюмюнде «Лада-Гранта» машиналадан ачхычланы къууанчлы халда бергендиле. Автомобильле энчидиле, иелерини саулукъларына келиширча этилгендиле.
Нарткъалада жашагъан Султан Дзагаштовну бу экинчи машинасыды. Ол аны поликлиникагъа, тюкеннге, жууукъларына барыргъа хайырланады. Ачхычланы ала, жашауу келген киши: «Сау болугъуз, келе тургъан Жангы жылны аллында манга бек аламат саугъа этгенсиз!» - деп, кёлю толуп билдиргенди ыразылыгъын.
Экинчи автомобильни иеси Аслан Шидаковну анасы да Фондда ишлегенлеге жюрек ыразылыгъын билдирир ючюн къалмагъанды эмда аны жашына дайым да кёз-къулакъ болуп тургъанлары ючюн ыспас этгенди.
Эсигизге салайыкъ: иш юсюнде ачыгъан дагъыда ючеулен быйыл июньда улоула алгъандыла. Транспорт жети жылгъа бериледи, андан сора уа инвалидлиги болгъан адам жангы машина сураргъа эркинди. Аны бла бирге уа, аны аллында алгъан машинасы да кесине къалады.
Фондну регион бёлюмю автомобильге бир кере тынгылы ремонт этиуню багъасыны 30 процентин да тёлейди.
Производствода ачыгъан адам Социал страхованияны фондундан бир жолгъа эмда ай сайын да страховой тёлеулени, саулугъуна багъарча дарманланы эмда медицина кереклени, санаторно-курорт путёвкаланы, реабилитация эмда протез-ортопед техника амалланы да хакъсыз алады.
М. Адилова.
Суратда: С.Дзагаштов жангы машинасы бла.
