Нальчикде Сабийлени эм жаш тёлюню чыгъармачылыкъ арасыны «Медицина-биология биригиу» деген бёлюмюне жюрюгенлеге (Цораланы Ф.С.) Къабарты-Малкъар къырал университетни Медицина факультетинде дерс бардырылгъанды, университетни преподавательлери алагъа мастер-классла кёргюзтгендиле.
Факультени деканыны усталыкъ сайлау эм юйретиу иш жаны бла орунбасары, госпиталь терапия кафедраны профессору Зарета Камбачокова ала талай жылны окъуучуланы вузгъа дери хазырлау бла кюрешгенлерин белгилегенди. Аны ючюн вузда битеу керекли мадарла этилгендиле: юйретиу аудиторияла, илму лабораторияла, кабинетле, библиотека фонд бардыла. Профессор-преподаватель къауум тыш къыраллада алимле бла байламлыкъла жюрютедиле. Факультетни бошагъанла урунуу рынокда жерлерин табадыла, кёпле башха регионлада урунадыла, дегенди ол.
Битеулю эм патология анатомия кафедраны ассистенти Мусукаланы Анжелика «Адамны патология анатомиясы» деген темагъа мастер-класс бардыргъанды. Ол билдиргенича, факультетде шёндюгюлю излемлеге келишген компьютер кабинетле ачылгъандыла, симуляция ара да барды, анда юйретиу адамны тюз да ич органларыча модельледе къуралады. Медицина илмуланы кандидаты Альбина Пшукова уа «Анатомия музей» деген темагъа мастер-класс кёргюзтгенди, ол окъуучулагъа дайым сейир болуучуду. Ол жыйылгъанлагъа врачны усталыгъы уллу жууаплылыкъны излегенин, адамны жашауу бла саулугъу докторну къолунда болгъанын эсгертгенди.
Бу иш «На острие науки» деген акцияны чегинде Россейде Илмуну бла технологияланы жылына аталып тамамланнганды.
Кульчаланы Зульфия.
