Казбек Коков Регионланы айнытыу жаны бла правительстволу комиссияны президиумуну видеоконференция амал бла бардырылгъан жыйылыууна къатышханды. Кенгешни РФ-ни Правительствосуну Председателини орунбасары Марат Хуснуллин ётдюргенди. Анда сёз «Жашау журтла эмда шахар болум» миллет проект къалай толтурулгъанына къаралгъанды.
Марат Хуснуллин 2021 жылны ахырына ишленнген эмда ишлене тургъан жашау журтланы саны тарых кёрюмдюге жетгенин, капитал салымла жаны бла федерал бюджетни толтуруу да игиленнгенин айырып айтханды. Къурулушну багъасы кётюрюлгенини сылтауларыны юсюнден сагъына, ол аладан бири битеу дуниягъа жайылгъан инфляция болгъанын чертгенди. Анга уа сырьёну багъасыны кётюрюлгенин, пандемия ючюн производствону тохтатыргъа тюшгенин, поставкала бла да тыйгъычла чыгъып тургъанларын къошаргъа керекди, дегенди.
Жыйылыуда докладла бла РФ-ни Правительствосуну Председателини орунбасары Дмитрий Чернышенко, РФ-ни къурулуш эмда ЖКХ министри Ирек Файзуллин, экономиканы айнытыу министрини орунбасары Сергей Галкин, регионланы башчылары да сёлешгендиле.
Къабарты-Малкъарда быйыл жашау журтладан 513 минг квадрат метрин хайырланыргъа берирге белгиленеди. Январь-ноябрь айлагъа хазыр болгъан юйле битеу да 429,6 минг квадрат метрни тутадыла. Ол а, былтырны ол кезиую бла тенглешдиргенде, 105,8 процентди. Кёп фатарлы юйлени ишлеу бла кюрешгенле 32 журтну хайырланыргъа бергендиле. 2022 жылда жашау журтладан 530 минг квадрат метрни ишлеп берирге мурат этиледи.
Жангы журтланы тийрелеринде инфраструктураны къурау андан ары бардырылады. Республиканы бюджетинден Искож микрорайонда инженер ызланы жангыртыугъа 50 миллион сомдан артыкъ бёлюннгенди. 2022 жылда Восточный микрорайонда суу бла жалчытыугъа федерал бюджетден 570 миллион сомдан артыкъ берилликди. Дагъыда Акъ-Сууда жангы юйле ишлене тургъан Эркин ёзенни тийресинде кир суулагъа энчи ызла къураугъа 198 миллион сомдан аслам бёлюрге белгиленеди.
2023 жылда Мишхидж коттеджли посёлокда инженер ызлагъа 128 миллион сомдан артыкъ къоратыллыкъды, Хасанияда жангы юйлени микрорайонуна уа 58 миллион сомдан аслам бёлюнюрюкдю. 2024 жылда «Дубки-07» эм «Сосруко» дачалы биргиуледе суу тартыу ишлеге 95 миллион сом берирге мурат этиледи.
КъМР-ни Башчысыны бла Правительствосуну
пресс-службасы.