КъМР-ни «Предпринимательликге себеплик этиу арасы» республиканы Экономиканы айнытыу министерствосуну болушлугъу бла бу кюнледе «Бизнес-старт 2021» форумну бардыргъанды. Аны магъанасы - жаш тёлюню эмда башхаланы предпринимательлик бла кюреширге кёллендириудю, аланы къырал бу жаны бла берген онгла бла шагъырейлендириудю.
Республиканы экономиканы айнытыу министрини орунбасары Ольга Белецкая ал сёзюнде сынамлары болгъан предпринимательле, экспертле да форумну кезиуюнде берлик информация ары келгенлеге хайырлы боллугъуна ышаннганын чертгенди.
Гитче эмда орта предпринимательлик къыралгъа бек магъаналыды. Ольга Викторовна билдиргеннге кёре, бюгюнлюкде республикада аны бла 19 минг адам кюрешеди. Регионну битеулю продуктуну (ВРП) 40 процентин ала жалчытадыла. Асламысы эл мюлкде, туризм бёлюмде, промышленностьда къармашадыла, арт кезиуледе IT-сфера да айнып тебирегени эсленеди. Кеслери алларына иш къурагъанланы саны да терк кёбейип башлагъанды. Озгъан жылны аллында тийишли закон къабыл этилгени бла, андан бери Къабарты-Малкъарда предпринимательство бла бу халда кюреширге сюйгенлени саны онеки мингнге жетгенди. Аланы барысына да къырал ол неда бу жаны бла билеклик этеди.
Бизни республикада да аны бла кюрешген кёп тюрлю структура барды. Аланы юслеринден «Предпринимательликге себеплик этиу араны» башчысы Мадина Дудуева хапарлагъанды. Бу учреждение 2019 жылда къуралгъанды. Кеси да сагъынылгъан къадар структураны ишлерин тийишдиреди. Ары уа была киредиле: гитче эмда орта предпринимательликге аз кредитле эмда гарантияла берген Фондла, экспортха эмда социал бёлюмде предпринимательликге бла инновациялагъа себеплик этген Арала, Инжиниринг ара, эл мюлк кооперация эм фермерлеге себеплик этиу сферада компетенцияланы Арасы. Алада бизнес-жамауатха тийишли жумушла тамамланадыла, учреждение кеси да кёп тюрлю конкурсла эмда эришиуле бардырады.
«Берилген болушлукъну юсюнден толуракъ айтханда, бу стуктуралада бизнесни регистрациясын этиу бла байламлы къагъытланы жарашдырыудан башлап, предприятияны жангыртыугъа эмда продукцияны тыш къыраллада рыноклагъа чыгъарыугъа дери жетеди ол. Ала берген амалланы юсюнден кёпден-кёп предприниматель билип башлагъаны да кёрюнеди», - деп къошханды министрни орунбасары.
Республиканы сатыу-алыу – промышленность Палатасыны башчысыны орунбасары Мурат Гукетлов да ол ишлеген биригиу предпринимательлеге не бла болушургъа боллугъун туура этгенди. Бюгюнлюкде ары 152 предприятие киргенин, алагъа продукцияларын башха регионлада рыноклагъа чыгъарыргъа себеплик этилгенин, къырал власть органла бла къыйматлы байламлыкъла къуралгъанын да чертгенди.
Форумну кезиуюнде «Жылны эм иги социал проекти - 2021» деген Битеуроссей конкурсну регионда кезиуюнде хорлагъанланы да белгилегендиле. Эм магъаналы миллет проектге кёре быйыл ол тизмеге сегиз адам тюшгенди. Ол санда «Сабийлени юйретиу эмда алагъа къошакъ билим бериу» бёлюмде «Ингилиз тил хар кимге да» деген биригиуню башчысы Кючменланы Амина бла «Намыс» предприятияны таматасы Къулийланы Малик да бар эдиле.
Кючменланы Амина «Лингвист» школну къурагъанды. Ол тыш къыраллы тиллеге юйретиу бла байламлы проектди, кесини да партнёрлукъ халда бёлюмлери бардыла. Бюгюнлюкде аладан бешиси барды, жууукъ кезиуде энтта да бири ачыллыкъды. «Быллай школ къураргъа деп онтёрт жыл мындан алгъа Москвада Финанс академияда окъугъан кезиуюмде акъылыма келген эди. Мен аны ачханлы алай кёп заман болмагъанлыкъгъа, бюгюнлюкде республикада башхаладан эсе аслам бёлюм къурап, биз алчыланы санындабыз», дегенди ол.
Саугъалаудан сора мастер-классла башланнгандыла. Айтханыбызча, аланы жетишимли предпринимательле, инвесторла, бизнес-тренерле, асламлы коммуникация сферада экспертле, министерстволаны бла ведомстволаны келечилери бардыргъандыла. Темаланы санында: «Бизнесге инвестицияла келтириу», «Бонус программа», «Ишчи ушакъ этиу», «Бизнесни бардырыргъа къыралдан болушлукъ алыу», «Жетишим», «Кеси аллынга иш къурау» деген эм башхалары бар эдиле. Форумгъа къатышханланы экспертле бла ушакъ этерге, соруула берирге онглары да болгъанды.
Улбашланы Мурат.
Суратда: Кючменланы Амина (ортада).
