Урысейм и Президентым и полномочнэ лIы­кIуэу КИФЩI-м щыIэ Чайкэ Юрийрэ округым хыхьэ щIыналъэхэм я Iэтащхьэ­хэмрэ хэтащ унафэщI ныбжьыщIэхэм я «Кавказым и къэкIуэнур» щIыналъэ­зэхуаку клубым иригъэ­кIуэкIа, илъэсым къри­кIуахэр щызэхалъхьэжа зэхуэсым.

«Кавказым и къэкIуэнур» зыфIаща, унафэщI ныб­жьыщIэхэм я щIыналъэзэхуаку клуб» щIэныгъэ проектыр егъэзащIэ Кавказ Ищхъэрэм ит еджапIэ нэхъыщхьэхэм я студентхэм я зэгухьэныгъэм, Урысей Федерацэм и Президентым и полномочнэ лIы­кIуэу Кавказ Ищхъэрэ ­федеральнэ щIыналъэм щы­­Iэм и аппаратым и нэIэ щIэтрэ Президент грантхэр я щIэгъэкъуэну. Зи лэжьыгъэр фейдэ къегъэщIыным темыщIыхьа, «Урысейр Iэмалхэм я къэралщ» платформэм иригъэкIуэкIа зэпеуэхэм щытекIуахэр зэ­къуэгъэувэнырщ жэрдэ­мыр зыхуэгъэзар.
«Фи кIэух съездым кърикIуэхэм япкъ иткIэ проектхэр, КИФЩI и социально-экономикэ зыужьыныгъэм хуэщхьэпэнухэр зэхэфлъ­­хьэну дыщогугъ. Зы илъэс дэкIащ. Пэжщ, ар икъукIэ мащIэщ, ауэ сэ быдэу си фIэщ мэхъу дэ зэхъуэ­кIыныгъэфIхэр икIи инхэр къызэрытпэплъэр», - жи­Iащ полномочнэ лIыкIуэм къызэхуэсахэм защыхуи­гъазэм. Абдеж къыщыхигъэщащ Псыхуабэ «Мэшыкъуэ» щIэныгъэ центр зэ­рыщаухуэр. «А центрым щIэ­ныгъэ зэрызрагъэгъуэт программэ куэд щагъэзэ­щIэнущ. Абы и лъэныкъуэ­кIэ ядэлэжьэнущ «ЩIэныгъэ» урысейпсо зэгухьэ- ныгъэм, зи Iуэхухэр                  фейдэ къегъэщIыным те­мыщIыхьа, «Урысейр Iэмалхэм я къэ­ралщ» къудамэм, Хэкуп­сэхэм я урысейпсо центрым хуэдэхэм, нэгъуэщI­хэми. Мыбдежым къыщы­хэзгъэщыну сы­хуейщ ЩIэ­­­ныгъэхэм я центру ­щы­тыну «Мэшы­къуэр» ­Кав­каз Ищхъэрэ федераль­нэ округым хы-хьэ щIыналъэ псоми щыщ­хэм я щIалэ­гъуалэм я зэхуэзапIэ, зэп­сэлъапIэ хъун зэры­хуейр. Абы и бжэхэр яхузэ­Iухауэ щытынущ Кавказ Ищхъэ­рэм сыт и лъэны­къуэкIи ­зегъэужьыным хуэунэтIа Iуэ­хухэр пхызыгъэкIыну зи мурад щIалэ­гъуалэ зэгу­хьэныгъэхэмрэ проектхэм­рэ. ИкIи дэ икъу­кIэ дыщогугъ КИФЩI-м и къалащхьэ Псыхуабэ кавказ щIалэгъуалэр зэпы­мыууэ щызэпыщIауэ щыты­ным центрыр хуэщхьэпэну», - жиIащ Чайкэ Юрий.
ЩIыналъэхэм я Iэтащ­хьэхэр тепсэлъыхьащ къу­лы­къущIэхэр гъэхьэ­зы­ры­ным хуэгъэпса программэ­хэмрэ зэпеуэхэмрэ я деж зэрыщрагъэкIуэкI щIыкIэм, абыхэм къарикIуа Iуэху нэхъыщхьэхэм. И гугъу ящIащ узыншагъэр хъумэнымкIэ  IэнатIэм лэжьыгъэр щIэм тету щызэтеухуэным, щIалэ­гъуа­лэ политикэмрэ волонтёр Iуэхухэмрэ къыщы­халъхьэ жэрдэмыщIэхэм, щIыналъэхэм заужьын пап­щIэ граждан жылагъуэр абы хузэщIэуIуэным мы­хьэ­нэшхуэ зэриIэм.
КИФЩI-м хыхьэ щIыналъэхэм щыщ щIалэгъуалэ жылагъуэ зэгухьэныгъэхэм я лIыкIуэхэм щепсэлъы-лIэм КъБР-м и Iэтащхьэ КIуэ­кIуэ Казбек Чайкэ Юрий фIыщIэ хуищIащ округым и ныбжьыщIэхэр зэкъуэгъэувэным хуэщхьэпэну IуэхуфI къызэрыхилъ­хьам папщIэ. Абы и ­фIыгъэкIэ щIалэгъуалэ, во­­лон­тёр зэщIэхъееныгъэхэм къыхэжаныкI, къулыкъущIэ­хэм я зэпеуэхэм хэт ныбжьыщIэхэм иджыри IэмалыфIхэр ягъуэтащ я зэфIэ­кIыр здынэсыр къагъэлъэгъуэнымкIэ, я щIэныгъэм, Iэзагъэм хагъэхъуэным- кIэ.
КIуэкIуэ Казбек щIалэ­гъуалэм я упщIэхэм жэ­уапхэр яритащ икIи ахэр ­щыгъуазэ ищIащ щIалэ­гъуа­лэ грант проектхэм трагъэкIуэдэну мылъкур илъэс къакIуэм къыщы­щIэ­дзауэ нэхъыбэ зэращIынум. «Апхуэдэуи проектыш­хуитI дгъэзэщIэну ди мурадщ. Япэр Творческэ ­щIалэгъуалэм я уардэунэр (Театрхэм я уардэунэр) ухуэнырщ. Абы щызэ­хуэт­шэсынущ творческэ гупхэр икIи дэтхэнэри дэзыхьэх унэтIыныгъэхэм щызэ­дэлэ­жьэнымкIэ Iэмал яIэнущ. ЕтIуанэр - «Iуащхьэмахуэ» корпоратив университет къызэгъэпэщынырщ. Ар увынущ унэтIыныгъэ зэмы­лIэужьыгъуэхэм хуэгъэпса, щIэныгъэм хуэунэтIа щIалэгъуалэ проектхэмрэ программэхэмрэ щыпхагъэкI, я зэфIэкIым зыщрагъэужь, IэнатIэ зэхуэмыдэхэм пэ-рыт IэщIагъэлIхэм я Iэзагъэм щыхагъахъуэ щIыпIэ», - жиIащ Къэбэрдей-Балъкъэрым и Iэтащхьэм.
ЗэIущIэм хэтхэр КъБР-м и Iэтащхьэм къеупщIащ уна­фэщIым хэлъын хуей хьэл-щэнхэр зыхуэдапхъэу къилъытэмкIэ. КIуэкIуэ Казбек жиIащ унафэщI, пашэ ­хъуныр цIыхум зыхуигъэувыж къалэн нэхъыщхьэу щытын зэрыхуэмейр, атIэ ныбжьыщIэм и IуэхущIа­фэхэм я лъабжьэу игъэувыпхъэр и IэщIагъэм фIыуэ хищIыкIыу, щIэныгъэфI бгъэдэлъу, цIыхухэм пщIэ яхуищIу щытыныр зэрыарар.
КъБР-м и Iэтащхьэмрэ
Правительствэмрэ я пресс-IуэхущIапIэ.