Дзэм къулыкъу щызыщIэнухэр щраджэ 2021 гъэм и бжьыхьэ лъэхъэнэр икIэм ноблагъэ. Абы хэту мы махуэхэм Налшык дэт республикэ дзэ военкоматым икIри Хэкум и хъумакIуэхэм я сатырхэм хыхьащ сэлэт щIалэщIэ гуп. 

Ахэр егъэжьэным ипэ къихуэхэу военкоматхэм лэжьыгъэшхуэ щрагъэкIуэкI. Мы бжьыхьэм Къэбэрдей-Балъкъэрым щыщу я дзэ ­къу­лыкъур ирахьэкIын папщIэ ираджэну я мурадщ ныбжьыщIэ миным нэблагъэ. Ди республикэм икIахэм я нэхъыбэм къулыкъур щрахьэкIынущ ЗыхъумэжыныгъэмкIэ министерствэм и лъэсыдзэхэм, Дзэ-хьэуа къа­рухэм, Лъэпкъ гвардием. Мы гъэм ди щIалэхэр хаугуэшэнущ къэралым и европей лъэныкъуэмкIэ, Уралым, Сыбырым, КъуэкIыпIэ Жыжьэм щы-Iэ IэщэкIэ зэщIэузэда къарухэм.
Къэбэрдей-Балъкъэрым и дзэ ­воен­коматым хъыбар къызэрыдигъэщIамкIэ, иджы къекIуэлIа щIалэщIэхэр къулыкъу ехьэкIыным ­хъарзынэу хуэхьэзырщ. Языныкъуэ­хэм щIэныгъэ нэхъыщхьэ зрагъэ­гъуэтащ. Хабзэ зэрыхъуауэ, сэлэт щIалэщIэхэр къулыкъу щрахьэкIыну частхэм кIуэн ипэ къихуэу формэ ­щатIагъэ. Ахэр банк картэхэмрэ зыхуэныкъуэ хьэпшыпхэмкIэ къызэ­рагъэпэщ. Илъэс дэкIым иджы хуэдэ лъэхъэнэм ди щIалэхэм я къулыкъур кърахьэлIауэ я унэ къагъэзэжынущ. Зи гъащIэр IэщэкIэ зэщIэузэда къарухэм езыпхыну мурад зиIэхэм адэкIи я къулыкъум пащэфынущ.
Бжьыхьэ дзэ дэшыгъуэм жэпуэгъуэм и 1-м щIидзащ. Дыгъэгъазэм икIэм пбы иухынущ. 
МЭЗКУУ Къан.
 
Сурэтым: (сэмэгумкIэ къыщыщIэ­дзауэ) мы махуэхэм Хэкум и хъу­макIуэ къулыкъум пэрыува Атэбий Алихъан, Мэш Резуан, Шыбзыхъуэ Андемыр, Алборэ Алий, Гюльмамедов Ахьмэд сымэ.