Нальчикде «Эдельвейс»  клубда  «Барыбыз да биргебиз!» деген ат бла тёгерек стол болгъанды. Аны ишине  Нальчикде билим бериу департаментни сабий эмда жаш тёлю чыгъармачылыкъ  арасыны  директоруну къуллугъун толтургъан  Зокъаланы  Даниял, «Боевое братство» битеуроссей жамауат организацияны Къабарты-Малкъар республикалы бёлюмюню башчысы Гелястанланы  Барисбий, организацияда  Жамауат палатасыны члени, Сауутланнган Кючлени эмда Уллу Ата журт урушну ветеранларыны КъМР-де бёлюмюню  толтуруучу комитетини  председатели Владимир Абаноков,  Чекчи службаны  Ветеранларыны  советини председатели  Владимир Сиволобов, КъМР-ни Жарыкъландырыу, илму эмда жаш тёлюню ишлери жаны бла министерствогъа бойсуннган билим берген учреждениялада ишлеген сабий жамауат организацияланы башчылары, Нальчик шахарда бир къауум окъуу юйлени школчулары да чакъырылгъандыла.

Ёсюп келген тёлюню патриот ниетледе юйретиуге эмда  тарых магъаналы ишлени эсде тутарча этиуге жораланнган «тёгерек столну» ишине бу жол Нальчикде 11-чи,  19-чу,  31-чи,  Акъ-Суу элде 15-чи, Кенжедеги 20-чы номерли окъуу юйлени школчулары къатышхандыла.  Хасания элден а  ары   Фрийланы Рамазанны атын жюрютген  16-чы номерли мектепни 10 «А» классыны окъуучулары Гайыланы Лейля, Башийланы Дарина устазлары-юйретиучюлери  Улбашланы Джамиля бла бирге да келгендиле.

Устазла мектепледе сабийлени патриот ниетледе юйретиу жаны бла къаллай ишле тамамланылгъанларыны юсюнден тынгылы билдириуле этгендиле, окъуучула уа  кёчгюнчюлюкню, республикада, Хасания элде жашагъан миллетлени бир бирлери бла шуёхлукъларыны юсюнден докладларын окъугъандыла.

Келген къонакъла да  кёп миллетли Къабарты-Малкъарда адамла бир бирлери бла шуёхлукъда жарашып жашагъанларыны, алайсыз да жарамагъаныны юсюнден кёп юлгюле келтирип хапарлагъандыла, жашауларында, ишлеринде, этген къуллукъларында шуёхлукъну юсюнден  магъаналы  шартла  келтирип айтхандыла. «Биз барыбыз да миллетибизге, тутхан динибизге да къарамай, биригип, бир бирибиз бла шуёхлукъда жашасакъ, не къыйынлыкъланы да хорларгъа къолубуздан келликди», деген оюм бла бошагъанды тёгерек стол кесини ишин.

Тюбешиуню  ахырында  анга къатышхан устазлагъа билим бериу департаментни атындан  сертификатла берилгендиле, докладла этген школчула уа грамотала, бюсюреу къагъытла  къоллу  да болгъандыла.                                 

Холаланы Марзият.