Почтаны эл бёлюмюне Ёзденланы Радикни къызы Къудайланы Зухура башчылыкъ этеди.
Ол Тёбен Чегемде жашайды, Хушто-Сыртха жюрюп ишлегенли жылдан артыкъ болады, почтаны иши бла уа алты жылгъа жууукъну кюрешеди. Ары дери ол Нальчикде, кесини элинде, Лячинкъаяда да уруннганды. Филология жаны бла билим алгъанды, Къабарты-Малкъар къырал университетни институтуну немис тилден бёлюмюн бошагъанды.
- Газетге жазылыуну юсюнден айтханда, ол жылгъа эки кере бардырылады. Мени оюмума кёре, аны бюгюнлюкде болгъанындан кёбюрек адамыбыз алса, сюерик эдим. Башхалагъа да аслам жазылыргъа тийишлиди, алай кесибизни газетибизге уа бютюн сакъ болургъа керекбиз - ёз тилингде окъугъанны магъанасы чексизди, - дейди Зухура.
Ушакъ нёгерибиз белгилегенича, эл гитчеди, 170-ге жууукъ арбаз барды. Былтыр газетге жангызда 22 адам жазылгъандыла. Алгъын жыллада уа аланы саны 40-50-ге дери жете эди. Быйыл 30 инсаннга жаздырыргъа борч салыннганды. «Аны толтурурбуз деп ышанама, алай белгилерге сюеме, ол азды. «Заманны» биринчи жарым жылны алгъан инсан, экинчи жарымында да аны окъургъа излейди. Окъуучула асламысында абадан адамладыла, ала кеслери кёзлери иги кёрмегенликге, жууукъларына окъутуп окъуна тынгылагъанларын эшитгенме.
Жарсыугъа, къартларыбыз кетип барадыла, жаш адамла уа газетни алыргъа ашыкъмайдыла. Багъасы уллуду дегенле да болурла. Алай жарым жылны ичинде битеу жангылыкъланы, билдириулени, айтхылыкъ адамларыбызны, тарыхыбызны, маданиятыбызны юслеринден материалланы окъуп турур ючюн, ол кёп тюйюлдю. Сора, газетни юсю бла адам тилин да байыкъландырады», - деп чертеди Зухура.
Кульчаланы Зульфия.