КъМКъАУ-ну Экономика эм управление факультетини «Агро-Альянс» командасы Россейни Банкы озгъан айны ахыр кюнлеринде бардыргъан Универсиаданы регион кесегине къатышханды. Аны санында экинчи курсну студентлери Мурачаланы Салима бла Байсыланы Джаннет да бар эдиле. Командагъа кёз-къулакъ болгъанланы къауумуна уа вузну «Финанс тинтиулени арасыны» илму-излем лабораториясыны башчысы Созайланы Танзиля, деканны илму-тинтиу ишле жаны бла орунбасары Зумакъулланы Фатимат, «Экономика» кафедраны доцентлери Хочуланы Зухура, Светлана Гурфова эм Залина Иванова эм башхала киргендиле.
Банкны Къыбыла бёлюмюню башчысы Евгений Эберенц, эришиулеге къатышханлагъа салам берип, быйыл аны баш темасы «Финанс рынокда ышаныулукъ» болгъанын билдиргенди. Ары уа юч тема киреди: «Финанс окъуулулукъ», «Финанс рынокда хыйлачылыкъгъа къажау туруу» эм «Финанс технологияла».
Саулай айтханда, Универсиадагъа 40 вузну келечилери къатышхандыла. Ол кеси да интерактив халда (МS Teams платформада) ётгенди. Программа Россейни Банкыны АС СОВА платформасында билим бериуден, викториналадан эмда тестледен къуралгъан эди. Анда дагъыда кибер хыйлачылыкъны, жалгъан ахчаланы ачыкълауну, тёлеу технологияланы, микрофинанс рынокну эмда башха темаланы юсюнден мастер-классла да бардырылгъандыла. Ала бары да студентлеге финансла жаны бла тынгылы билим алыргъа себеплик этгендиле, деп билдиргендиле КъМКъАУ-ну пресс-службасындан.
Улбашланы Мурат
хазырлагъанды.