ЦIыхухэр тхылъ еджэу ящIыжын папщIэ, Бразилием щылажьэ тхылъ тедзапIэхэм хэкIыпIэ гъэщIэгъуэн къагъуэтащ. 
 Тхылъ тедзапIэхэм я зым и жэрдэмкIэ, метром ущитIысхьэкIэ, билетым и пIэкIэ тхылъ къэбгъэсэбэп хъууэ къагупсысащ. 
 КъызэрыщIэкIымкIэ, Бразилием ис цIыхухэр апхуэдизкIэ еджэным щыужащи, илъэсым зы тхылъ-тхылъитI еджэми аращ. Тхылъым и пщIэр къаIэтыжын папщIэ, тедзапIэхэм я зым хэкIыпIэ гъэщIэгъуэн къыщагъуэтащ: тхылъхэм я жинт лъабжьэм электрон картэхэр кIэрагъэпщIауэ, иджы метром ущихьэкIэ, ахэр билет папщIэу къэбгъэсэбэп мэхъу. Тхылъ-билетым пщIэнейрэ метром уисыну хуитыныгъэ къыует. А пIалъэр икIа нэужь, тхылъыр зыIыгъ цIыхум электрон билетым щIэрыщIэу «псэ къыхигъэхьэжу», аргуэру къигъэщхьэпэ хъунущ. Апхуэдэ Iэмалым, ухуей-ухуэмейми, пIэщIэлъ хъугъуэфIыгъуэм уеджэну утрегъэгушхуэ, мыхъужыххэмэ, зыгуэрым тыгъэ хуэпщIынуи ухуитщ. 
 Гупыжыр къыхэзылъхьа тедзапIэм и гукъэкIыр Бразилие псом къыщыдаIыгъри, Тхылъым и дунейпсо махуэм Сан-Паоло метром пщIэншэу тхылъ  10000-м  нэс щагуэшащ. 
 

Чэрим Марианнэ.