Россейни Правительствосуну Председателини орунбасары Александр Новак Къабарты-Малкъаргъа ишчи жумуш бла келип тургъан кезиуде, ишчи къауум бла турист объектлеге къарагъанды. Аны биргесине КьМР-ни Башчысы Казбек Коков да болгъанды, деп билдиредиле республиканы оноучусуну пресс-службасындан.
Республиканы турист онглары бла шагъырейленнгенде, жолоучуланы аслам халда келип башлагъанларын эсге алып, тёгерекни тапландырыугъа аслам эс бурургъа кереклиси эм «Эльбрус» курортну инвестиция онгларыны юсюнден айтылгъанды.
Кавказ.РФ деген биригиуню генеральный директору Хасан Тимижев план-проектни кёргюзтгенди, анга кёре, Россей Федерацияны Правительствосу 2020-2024 жыллада курортну айнытыууна деп федерал инвестиция программаны чеклеринде 15 миллиард сом бёллюкдю. Тергеулеге кёре, 2030 жылгъа «Эльбрус» курортха 1,2 миллион адам келликди. Инвестиция проектлени хайырланыу адамланы орнатыу жерлени санын кёбейтирге онг берликди, жангы канат жолла эм тау-лыжа трассала да ачыллыкъдыла.
Республиканы эм Кавказ. РФ биригиуню аллында курорт объектлени тапландырыу борчла турадыла.Инвестиция онгланы толусунлай хайырланыр ючюн, инфраструктура тыйгъычланы къурутургъа керекди: качестволу электрокюч бла жалчытыу, коллекторну эм кир суула жыйылыучу системаланы жангыртыу, таудан къарла юзюлюп келгенде, аланы тыйыу системаланы ишлеу эм тынгылы ремонт этиу, чыракъла жанарча чыпынланы орнатыу, тротуарланы ишлеу, машинала тургъан жерлени къурау.