Россейни Правительствосуну вице-премьери Александр Новак бла КБР-ни Башчысы Казбек Коков Огъары Бахсанда жангы сабий садны ачылыууна къатышхандыла. Сабий сад 42 сабийге деп тергелип ишленнгенди, анда жыл бла жарым эм юч жыллары толмагъан сабийле турлукъдула.
Жангы учреждение «Тиширыуланы иш бла жалчытыу-юч жыллары толмагъан сабийлеге школгъа дери билим берирге онгла къурау» деген федерал проектни «Демография» миллет проектини чеклеринде къуралгъанды.
Бу проектни жашауда бардырыуда федеральный бюджетден 39 миллион сомдан аслам бёлюннгенди.
Алгъын сабий сад эски юйню ичинде орналып тургъанды, жангы мекямда сабийле турурча битеу онгла къуралгъандыла, учреждения хар зат бла да жалчытынылыпды.
Александр Новак бла Казбек Коков сабийле школгъа дери жюрюген учрежденияны отоуларына къарагъандыла, анда ишлегенле бла сёлешгендиле, эллилени жангы сабий сад бла алгъышлагъандыла эм сабийлеге бла юйретиучюлеге жетишим тежегендиле.
Элде абадан адамларындан бири, Абдуллаланы Исмайыл эллилени атларындан школгъа барлыкъ тёлюге деп къырал аллай аламат онгла къурагъаны ючюн ыспас этгенди.
Казбек Коков белгилегеннге кёре, сабийлени айнытыуларына тийишли онгла къурау соруулагъа уллу эс бурулады-ол Россейни Президенти Владимир Путинни политикасыны баш бёлюмлеринден бириди.
Къабарты-Малкъар Республикада арт эки жылда 43 сабийле школгъа дери жюрюген 43 блок ишленнгенди, алада 2740 жер барды. 2021 жылны ахырына дери энтта да сабийле турурча 525 жер къураллыкъды - ол а школгъа дери сабийле жюрюген сегиз объектди, деп билдиргендиле республиканы оноучусуну пресс-службасындан.
КъМР-ни Башчысыны бла Правительствосуну пресс-службасы.
