«УЛЛУ ПЕРЕМЕНАДА» ХОРЛАГЪАНЛАГЪА АЛГЪЫШЛАКъабарты-Малкъар Республикадан тамата класслада окъугъан юч окъуучу «Уллу перемена» деген Битеуросей конкурсда хорлагъандыла. Бечелланы Айдана Нальчикни алтынчы школунда, Амир Гоноков бешинчи мектебинде окъуйдула. Жаболаны Ахмат «Кюн шахар» Сабий чыгъармачылыкъны академиясда билим алады. Битеуроссей конкурсну финалына Къабарты-Малкъардан битеу да 10 окъуучу чыкъгъандыла, ала Нальчик эм Бахсан шахарладан, Чегем, Урван эм Эльбрус муниципал районланы битеулю билим берген учрежденияларыны окъуучуларыдыла. «Уллу перемена» конкурс тогъузунчу эм он биринчи класслагъа жюрюген окъуучулагъа деп къуралгъан «Россия-онгла берген къыралды» деген президент платформаны проектиди. Финальны ачылыуу Халкъла аралы «Артек» сабий арада бардырылгъанды. Битеу къыралдан хоралагъанланы саны 600 болгъанды. Тамата класслада окъугъанланы саны, Къабарты-Малкъардан окъуучуланы да къошуп, юч жюз эди, ала билимлерин ёсдюрюрге деп биршер миллион сам алгъандыла эм бийик билим берген учреждениялагъа кирирге портфолиоларына къошакъ халда балла къошулгъандыла. Конкурсда хорлагъанланы Россейни Президенти Владимир Путин алгъышлагъанды: «Сиз ёрге чыгъар ючюн тийишли жолну ётгенсиз, ийнанама, сизни хар биргиз да тюшюнгенине: «Уллу перемена»-къуру конкурс болуп къалмай бек уллу затды: ол битеу къыралда жюз минг жаш адамны бирикдирген шуёх командады, бир ниетлилени керти жыйылыулары, хар бирин да даражасын чыгъаргъан, кеси кючлерине ийнанганларына онг берген, жашауларында энчи жолну тапханлагъа болушлукъ этген жерди». Къабарты-Малкъар Республиканы Башчысы Казбек Коков Инстаграмда кесини бетинде тамата класслада окъугъанланы ата аналарына, педагоглагъа эм юйретиучюлеге алгъыш сёзле айтханды, «сизни хайырыгъыздан сыйлы хорламла болдурулгъандыла». «Жюрегимми теренинден бизни окъуучуларыбызны «Уллу перемена» деген Битеуроссей конкурсда хорлагъанланы алгъышлайма». Школчулагъа уллу аперим!», - деп жазылады Казбек Коковну конкурсда хоралагъанлагъа этген алгъыш сёзюнде. Бизни корр.
Поделиться: ЧИТАТЬ ТАКЖЕ:
|