Къабарты-Малкъар Республиканы Башчысы К.В.Коковну Хорламны кюню бла  алгъышлауу

Къабарты-Малкъарны хурметли жамауаты!

Багъалы ветеранларыбыз!

Сизни Уллу Хорламны кюню бла жюрегимден къызыу алгъышлайма!

Биз барыбыз да багъалагъан бу сыйлы байрам миллет бирликни, фашизмге къажау къанлы къазауатда Ата журтну эркинлигин бла жалынчакъсызлыгъын къоруулагъан ата-бабаларыбызны аскер махтаулукъларыны, антларына кертичиликлерини, жигитликлерини да белгиси болуп келеди.

Жылла бир бирлерин алыша барадыла, алай бу кюн кюйсюз душманны хорлагъан, Ата журтубузну къоруулап, Экинчи дуния урушну барыу халын тюрлендирген халкъыбызны бюгюлмезлик кючюню бла ётгюрлюгюню аламат шагъаты болгъанлай къалады, мындан ары да алай боллугъу хакъды. 

Хорлам ючюн бизни республикагъа, саулай къыралгъа да къаллай уллу багъа тёлерге тюшгенин биз бир заманда да унутурукъ тюйюлбюз. Ата журт ючюн жанларын бергенлеге дайым махтау саллыкъбыз, уллу сынауладан ётюп, кишилик да, батырлыкъ да этип, кюйсюз душманны хорлагъан жигитлерибиз бла ёхтемленнгенлей турлукъбуз.

Бу байрам кюнде Уллу Ата журт урушха къатышханлагъа, тылда урунуп, Хорлам ючюн кючлерин-къарыуларын аямагъан адамларыбызгъа да энчи ыспас этебиз, жюрек ыразылыгъыбызны билдиребиз. Аланы Ата журт ючюн кеслерин аямай къазауат этгенлери, аскер жигитликлери бла урунуу жигерликлери бизге ёмюрден ахыргъа юлгю болгъанлай къаллыкъдыла, туугъан жерибизге кертичиликге бла чексиз сюймекликге кёллендиргенлей турлукъдула.

Россейни къоркъуусузлугъун къоруулай, нацизмни жангыдан баш кётюргенине къажау сюелип, энчи аскер операцияны ал сатырларында баргъан аскерчилерибизни алларында да баш урабыз. Аланы араларында Къабарты-Малкъарны жигит жашлары да къуллукъ этедиле. Биз ала бла ёхтемленебиз эмда ала кёп да бармай Хорлам бла къайтырыкъларына ийнанабыз.

Багъалы жерлешлерим!

Кёп миллетли халкъыбызны бир заманда да болмагъанча къаты бирикгени келтиргенди Уллу Хорламгъа. Ма ол бирлик бюгюнлюкде да Ата журтубузну деменгилилигини ышаннгылы мурдоруду, Россейни къолайлы келир жашауу ючюн белгиленнген муратлагъа жетерге итиндирген кючдю.

Байрам бла, багъалы жерлешлерим! Уллу Хорламны кюню бла!

Жюрегими теренинден сизге кийик саулукъ, монглукъ эмда ырахат жашау тежейме!