Кючмезланы Руслан бюгюнлюкде РФ-ни КъМР-де Ич ишле министерствосуну инспекциясыны таматасыды, ич службаны полковнигиди. Къыралыбызда 10 ноябрьде Ич ишле органлада къуллукъ этгенлени кюнюн белгилегендиле. Биз да ол кюннге жоралап, Руслан бардыргъан огъурлу жумушну юсюнден айтабыз.
Форманы киерге Руслан Николаевич школ жылларындан да термиле эди. Аны анасы Любовь Мажидовна Кучмезова кёп жылланы Акъылбалыкъ болмагъанланы ишлери жаны бла бёлюмде ишлеп келгенди. Жаш тёлю аманлыкъчылыкъны жолуна турмаз ючюн ол билимин, сынамын да аямай къуллукъ этгенди. Аны ол къыйыны унутулуп къалмай, тюрлю-тюрлю сыйлы саугъала бла белгиленнгенди. Алай Любовь Мажидовна бек даражалыгъа Нальчик шахарны Сабий юйюню коллективини «За заботу и любовь к детям» деген дипломун санагъанды. 2008 жылда огъурлу тиширыу дуниясын алышханды.
Руслан Николаевич сабийлигинде анасыны ишине барыуун бюгюн да тансыкълай тюшюреди эсине. Аны акъылбалыкъ болмагъанланы ата-аналары бла бир тил таба билиуюн, алагъа не жаны бла да болушургъа итиннгенин ол унутмагъанды. Ишни къуралыуун кёре, жаш къаллай ызны сайларыгъын ол кезиуде окъуна белгилеген эди кесине.
1997 жылда школну бошагъандан сора ол, битеу нормативлени, экзаменлени да берип, РФ-ни МВД-ны Санкт-Петербургда университетини Нальчикде филиалына окъургъа киреди. Анда жаш милицияда къуллукъ этиуню жорукъларына, излемлерине тюшюнеди. Сайлагъан усталыгъына уллу кёллю болмагъаны анга артда ишинде бек болушханды. Бу окъуу юйде энчи орта билим алгъандан сора, Руслан Николаевич Ростовну юристле хазырлагъан академиясыны Нальчикдеги филиалына киреди. Окъууун иш бла бирге бардыра, ол урунуу жолун Ич ишле министерствону КъМР-де УГИБДД-ны энчи техника жаны бла взводда инженерни къуллугъунда башлагъанды. Андан сора аны шахарны ич ишле бёлюмюню Акъылбалыкъ болмагъанланы ишлери жаны бла подразделениясына ётдюредиле. Сабийлени закон бла берилген эркинликлерин къоруулау службагъа ол жашаууну 8 жылын бергенди.
Ишин уста билген жашха КъМР-де жамауат низамлыкъны жалчытыу жаны бла бёлюмню ишин ышанадыла. Ызы бла уа Руслан Николаевични РФ-ни Ич ишле министерствосуну Элбрус районда бёлюмюне таматагъа саладыла. 2015 жылда уа сынамлы офицер КъМР-де Ич ишле министерствосуну Штабыны таматасыны орунбасары болуп урунады.
- Бизни, офицерлени, баш борчубуз халкъны сейирлерин бла къоркъуусузлукъларын сакълауду. Салыннган борчланы уа биригип, кенгеше, алай тамамлайбыз, - дейди Кючмезланы Руслан.
Бош заманын бюгюннгю жигитибиз юйюрю бла ётдюрюрге сюеди. Ол бир жаш бла эки къыз ёсдюреди. Сабийле алыкъын школчуладыла. Алай аланы сайлаулары къаллай болса да, ата билеклик этерге хазырды.
- Усталыкъ бла байламлы сайлауну хар адам да кеси этерге керекди, - деп оюмлайды Кючмез улу.
Энчи магъана ол спорт бла кюрешиуге бёледи. Юйюнде тренажёр зал къурагъанды. Анда кёп затланы кеси къолу бла жарашдыргъанды. Спорт жаны бла хазырлыкъ аланы ишлеринде нени да башы болгъанын бюгюннгю жигитибиз энчи белгилейди.
Полициягъа къуллукъ этерге келген жаш адамладан а ол жууаплылыкъ излейди. Аланы хар бири да кеси участкасында низамлыкъны жалчытыргъа, гражданланы сейирлерин къорууларгъа итинирге борчлудула.
Къасымланы
Аминат.
