Минги тау таба баргъан А-158 трассаны жанларын суу ашагъандан къоруулагъан ишлени аслам кесеги бошалгъандыла. Къурулушчула онеки участкада мадар этгендиле, быйылны ахырына дери энтта жетисинде хар нени да тамамларыкъдыла, деп билдиргендиле жоллагъа къарагъан «Кавказ» управлениядан.
Бу ишлени управление буруннгу жыл башлагъанды. Подряд организацияны адамлары жолну Бахсан суугъа жууукъ тургъан участкаларында жерни 9-18 метр теренине тешип, темирден бла бетондан багъанала ишлейдиле. Проектге кёре, аладан битеу да 8,5 минги болургъа керекди, бюгюнлюкге 8,1 минги хазырды. Ала бары да битселе, жолну 5,7 километр кесеги суу ашагъандан къорууланырыкъды.
Шёндю трассаны Тырныауузну, Быллымны, Бедикни, Огъары Бахсанны, Элбрус эм Нейтрино эллени, дагъыда «Ит-къол» пансионатны къатларында участкалары къоркъуусуз болгъандыла. Эм узун «багъана хуна» 750 метрге созулады. Алай ол кёзге хазна урунмайды, нек дегенде жер башына аны жаланда жарым метрлик кесеги чыгъады.
Бу кюнледе специалистле юч участкада ишлей турадыла. Алада жерни тешген алты установка эмда жыйырмадан артыкъ машина барды. Бир багъанагъа орун хазырларгъа 3-6 сагъат кетеди. Эсге сала айтсакъ, 2018 жылда суу къутуруп, бу жолну талай жерлерин ашагъан эди. Этиле тургъан ишлени хайырындан а мындан арысында аллай болумладан къутулургъа боллукъду.
Улбашланы Мурат хазырлагъанды.
