Эллилеге деп Россельхозбанк «Свое родное. За городом» деген платформаны мурдорунда виртуал практикум бардырып башлагъанды. Анда къонакъбайлыкъ индустрияны энчилигини юсюнден хакъ алмай окъутадыла, деп билдиргендиле банкны Къабарты-Малкъарда бёлюмюнден.
– Жетишимли агротуризм тириликден, итиниулюкден эмда иги билимден къуралады. Ол жаны бла ишни тинтирге эмда аны эбине жетерге жылла къоратыргъа керекди. Сагъынылгъан платформаны хайырланыучула уа Россельхозбанкны цифралы сервислерини болушлукълары бла къысха заманны ичинде агробизнес къураргъа неда кеслерини фермер мюлклерин айнытыргъа боллукъдула, - дегенди финанс учрежденияны аллай технологияланы айнытыу арасыны башчысы Елена Батурова.
Къабарты-Малкъарда эл туризм фермерлеге бек уллу файда келтирликди. Республикада малчылыкъ, битимчилик, терек бахчачылыкъ, тахта кёгетчилик, аш-азыкъ туризм сфералада къармашхан 4600 чакълы мюлк барды. Алагъа быллай бизнес бек иги онглары болгъаннга саналады. «Туризм эмда къонакъбайлыкъ индустрия» миллет проектни чеклеринде эл туризмни айнытыу – элледе инфраструктураны игилендирирге, жаш тёлюню жеринде иш бла жалчытыргъа себеплик этерикди. Эм башы уа, быллай туризм Къабарты-Малкъарны даражасын жаланда бизни къыралда угъай, тыш къыраллада да кётюрлюкдю.
Россейде агротуризмге сурам уллудан уллу бола барады. Бюгюнлюкде 3,5 мингден артыкъ къонакъ юй, минг чакълы фермер мюлк ишлейди. Эл туризм бла байламлы объектлени, ол санда къолдан усталаны эмда солуу араланы, музейлени саны уа он мингнге жетгенди. Сагъынылгъан мюлклени экиден бири платформада кёргюзтюледи. Ары киргенле аш-азыкъ этген мастер-классла, дегустацияла, экскурсияла, солуу программала табаргъа боллукъдула.
Россельхозбанкны тергеулерине кёре, агротуризмни файдалыгъы, саулай къыралда алып къарагъанда, бир жылгъа 55 миллиард сомгъа жетерикди. Эллеге баргъан туристлени саны уа - сегиз миллион адамгъа.     
Омарланы Мурат 
хазырлагъанды.