Кёп болмай Къабарты-Малкъар къырал университетни келечиси эм магистранты Руслан Жидков «Машук-2021» Шимал Кавказ жаш тёлю форумну «Факультет большого будущего» деген ючюнчю урумуна къатышып кесин айырмалы кёргюзтгенди. Аны «Адаптол» тенг амалланы жаш тёлю медицина-биология школу» проектине «Росмолодёжь» федерал агентство 490 минг сом грант бёлгенди.
- Программагъа кёре 8-11-чи классланы келечилерине деп мастер-классла, профессионал клубла эм семинарла бардырыллыкъдыла. Энчи оборудование алынырыкъды, кардиология, нерва-психика, микро-биологя эм башха тинтиуле бардырыллыкъдыла,- деп билдиргенди проектге башчылыкъ этген Руслан Жидков.
Андан сора да, окъуучула Нальчикде хунерли сабийлени айнытыу бла кюрешген «Антарес» араны жокъларгъа онг табарыкъдыла. Билим бериу программа юч кесекден къураллыкъды. Быйыл декабрьде энчи оборудование алынырыкъды, ызы бла профильли бёлюмледе окъугъан студентлени билимлерин ёсдюрюрча мадар этилликди эм ахырында сабийле бла ишлерча келишим этилликди. Тинтиуле «Биология», «Лечебное дело», «Педиатрия» жаны бла бардырыллыкъдыла.
- Бизни школгъа хар сюйген келирге боллукъду. Мында сабийлеге кеслерине тинтиуле бардырырча, профессионал оборудованиялада ишлерге юйренирча онг тапдырыллыкъды. Дерслени КъМКъУ-ну студентлери берликдиле. Аллай амал аланы илмугъа талпындырыргъа себеплик этерикди,- деп къошханды Жидков.
Магометланы
Сулейман.
