МЧС-ни Элбрус бийик тау излеу-къутхарыу отрядыны къутхарыучулары вертолётдан парашютсуз тюшюуден юйрениулеге къатышхандыла, деп билдиргендиле министерствону регионда Баш управлениясыны пресс-службасындан.
Хар къутхарыучу МИ-8 вертолётдан 20, 30 эм 40 метр бийикликден, энчи оборудованиясын бла снаряжениясын да алып, бешишер кере тюшгенди. Юйрениулени кезиуюнде ала ачыгъанны лебедка бла башына чыгъарып да кёргендиле.
Быллай ишле МЧС-чилени усталыкъларын ёсдюредиле, дайым хазырлылыкъда турургъа юйретедиле эм таулада, къыйын жерледе адамланы къутхарыу технологияланы айнытадыла. Ала жылгъа эм азындан тёрт кере къураладыла.
- Вертолётдан тюшюу эм къыйын борчладан бириди, былайда хауа суднону экипажыны бла къутхарыучуланы байламлыкъда ишлей билгенлери уллу магъананы тутады. Быллай жараула къутхарыучулагъа ачыгъанны авиацияны болушлугъу бла неда авиацияны хайырланыргъа онг болмагъан къыйын тау болумлада къоркъуусуз жерге жетдириуде сынамларын кючлерге керекдиле, - дегенди отрядны башчысы Гюлюйланы Мухамммат.
Кульчаланы Зульфия.
