КъМР-ни Жамауат палатасыны АПК-ны эмда эл тийрелени айнытыу комиссиясыны жыйылыуунда бизни республикада агропромышленность комплексге эмда эллеге къырал быйыл берлик болушлукъну сюзгендиле, деп билдиргендиле Палатаны пресс-службасындан.

Комиссияны башчысы Юрий Колесников бу иш бла байламлы халны туура этгенди. Ол билдиргенича, бу болушлукъ «Къабарты-Малкъарда эл мюлкню айнытыу эмда эл мюлк продукция, сырьё, аш-азыкъ рынокланы тап халгъа келтириу» бла «Къабарты-Малкъар Республикада эл тийрелени комплекс халда айнытыу» деген программаланы чеклеринде бериледи.

РФ-ни Эл мюлк министерствосу бла КъМР-ни Правительствосу ала бла байламлы он келишим этгендиле. Алагъа кёре республикагъа 2221,36 миллион сом берилликди. Ол санда 2104,3 миллионну федерал бюджетденди, къалгъанын а республиканы бюджетинден къошарыкъдыла.

Бу ахчаны асламысыны (2035,8 миллион сомну) оноуун республиканы Эл мюлк министерствосу этерикди. КъМР-ни Къурулуш эмда жашау журт-коммунал мюлк министерствосу уа – 185,56 миллион сомну.

Октябрь айны онбешинчисине сагъынылгъан ахчаны 76,57 проценти келгенди. Къалгъаны да жылны ахырына дери жетерикди. Андан 112,6 миллион сом агропромышленность комплексде объектлени къураугъа неда жангыртыугъа этилген къоранчланы бир кесегин жабаргъа бёлюнюрюкдю. Эл мюлк жерлени сугъарыргъа уа 250 миллион сом къоратыллыкъды. Энтта да 226,9 миллион сом бла мирзеу ёсдюрюрге эмда алыучулагъа жиберирге этилген къоранчланы кесегин жабаргъа дейдиле.

Элледе тургъанланы жашау болумларын игилендирирге да 2,07 миллион сом къоратыллыкъды. Дагъыда быллай тийрелени шёндюгю излемлеге келтирир муратда 183,48 миллион сом багъасына мадар этилликди. Фермерлеге себепликге эмда эл мюлк кооперацияны айнытыугъа уа 97,61 миллион сом бёлюнюрюкдю.

Комиссияны келечилери сагъынылгъан министерстволаны бёлюннген ахчаны быйылны ахырына дери тийишлисича хайырланыргъа чакъыргъандыла.

Улбашланы Мурат.