Къабарты-Малкъар къырал бийик тау заповедникни 45 –жыллыгъына аталып «Россейни энчи сакъланнган жерлерини къанатлылары» деген сурат кёрмюч ачылгъанды. Ол юбилейге жораланнган программаны чеклеринде бардырылады.
Кёрмючню магъанасы - жамауатха энчи сакъланнган жерлени юсюнден кенг билдириргеди. Андан сора да, алада болгъан жаныуарлагъа, къурт-къумурсхалагъа, къанатлылагъа эм битимлеге да сакъ кёзден къаралырча этергеди.
Суратланы авторлары – Россейни заповедниклеринде бла миллет паркларында ишлеген профессионал сурат алыучуладыла. Бу жол ала энчи сакъланнган жерледен эллиге жууукъ сейир кадрла келтиргендиле. Мында Къызыл китапха кирген гитче чыпчыкъладан башлап уллу къушлагъа дери кёрюрге амал барды. Аны бла бирге, заповедникни ишлери бла шагъырейленирге эм авторлагъа да тюрлю-тюрлю соруула берирге онг чыгъарыкъды.
Эсге сала айтсакъ, кёрмюч Къырал миллет библиотекада 15 ноябрьге дери ишлерикди.
Тогъузаланы Лейля,
КъМР-ни къырал бийик тау заповеднигини
таматасыны орунбасары.