Кёп болмай КъМР-ни Эл мюлк министерствосунда Масим Панаговну башчылыгъы бла ведомствону жамауат советини кенгеши болгъанды. Анга эл мюлк министр Хасан Сижажев да къатышханды. Тюбешиуде этилген эмда тамамланыргъа тийишли ишле белгиленнгендиле. Аны бла бирге эл мюлк производствогъа къыралны жанындан болушлукъ этиу да сюзюлгенди.

Къыйматлы программаланы юсюнден Эл мюлк министерствону финансла, экономика эм къырал болушлукъ управлениясыны таматасы Алим Калмыков айтханды.

- Быйыл республиканы агропромышленный комплексине 2,2 миллиард сом бёлюнюрюкдю. Андан федерал бюджетге 2,1 миллиард сом жетеди, республика да кесинден 0,117 миллиард сом къошарыкъды. Бюгюнлюкде 1,7 миллиард сом хайырланылгъанды. Ол санда 1,6 миллиард сом федерал эм 0,096 миллиард сом а республиканы бюджетинден.

Быйыл тирлик жыйыуну эсеплерини эм малчылыкъ бёлюмде болумну юсюнден эл мюлк министрни орунбасары Тимур Вадахов билдиргенди.

Хасан Сижажев айтханнга кёре, пандемиягъа да къарамай, агропромышленный комплекс предприятияла бирси заманладача ишлейдиле. Жерчиликде къыстау къармашханла алыучуланы жараулу продуктла бла жалчытырча кезиулю ишлени бардырадыла.

Магометланы Сулейман.