КъМР-ни Башчысы Казбек Коков Регионланы айнытыу жаны бла правительстволу комиссияны президиумуну Россейни Правительствосуну Председателини орунбасары Марат Хуснуллин бардыргъан жыйылыууна къатышханды. Анда ол  бек уллу инфраструктура проектге – Бахсанда 77 километрни тутхан суу ызны тартыугъа –  федерал бюджетден кредит берилирча этгенди. Регион ол жумушха 2,1 миллиард сом аллыкъды. Проектни битеу багъасы уа 2,6 миллиард сомду. Аны 2022-2023 жыллада ишлеп бошаргъа белгиленеди.

Республиканы оноучусу жыйылгъанланы эслерин бу шартха бургъанды: проектни хайырындан бир жолгъа эки борчну толтурургъа къолдан келликди. Биринчиден, Бахсан шахарда, Заюковода, Атажукинода, Исламейде, Баксанёнокда, Псычохда жашагъанла таза суу бла жалчытыллыкъдыла. Экинчиден, Бахсан шахарда бла Бахсан районда инвесторну  жашау журтланы къурулушлары жаны бла проектин жашауда бардырыргъа онг чыгъарыкъды. Регионну жанындан инфраструктура болушлукъ этилсе, инвестор бу жумушха кесини ахчасындан 6,8 миллиард сом къоратыргъа хазырды. Районда бла шахарда уа 2038 жылгъа битеу да жашау журтладан 260 минг квадрат метрден аслам ишлерге белгиленеди.

Андан сора да, проект толтурулса, республиканы бирикген бюджетине иги кесек налог тюшерикди, 240 ишчи жер къураргъа да онг чыгъарыкъды.

Правительстволу комиссия Къабарты-Малкъарны заявкасын къабыл кёргенди.

Бюгюнлюкде «Шимал-Кавказ федерал округну айнытыуну» программасына кёре Бахсанда ишленирик суу ызны проект-смета документациясы жарашдырыла турады. Жылны ахырына къырал экспертиза ыразылыгъын берир деп сакъланады. 

Регионнга инфраструктура кредитле бериуню программасына къошулургъа  республиканы къырал борчуну азайгъаны эмда коммерциялы кредитле тёленип бошалгъаны да себеплик этгендиле.