Зэпеуэ

Сочэ къалэм дэт «Сириус» егъэджэныгъэ центрым иджыблагъэ щекIуэкIащ Финанс шынагъуэншагъэмкIэ япэ дунейпсо олимпиадэ. Абы хэтащ Белоруссием, Къэзахъстаным, Къыргъызстаным, Урысейм, Таджикистаным, Тыркуменистаным, Узбекистаным щыщ ныбжьыщIэ 300-м щIигъу.

Зэпеуэр къыщызэIуахым УФ-м и Президент Путин Владимир абы хэтхэм зэрызахуигъазэ псалъэм къеджащ къэрал Iэтащхьэм и дэIэпыкъуэгъу Серышев Анатолий. «Нобэ дызыхэпсэукI дунейм псынщIэу зехъуэж. Технологиехэр йофIакIуэ, егъэджэныгъэм, щIэныгъэм зыужьыныгъэшхуэхэр щокIуэкI. Абы ипкъ иткIэ щIалэгъуалэм фи зэфIэкI зэрывгъэлъэгъуэным, фи къэухьым зэрызевгъэужьыным, IуэхугъуэщIэхэм зэрызыщывгъэгъуэзэным хуэунэтIауэ Iэмал нэхъыбэ къызэрыфхузэдгъэпэщыным гулъытэ худощI. Лэжьыгъэ едгъэкIуэкIхэм я зы Iыхьэщ мы олимпиадэр: абы и къалэн нэхъыщхьэр къэрал хабзэхэм, финанс зехьэкIэм фIыуэ хащIыкIыу, щIэпхъаджагъэмрэ экстремизмэмрэ пэIэщIэу щIэблэр къэхъунырщ. Шэч къытесхьэркъым къэкIуэнум фIыкIэ ухуэзыгъаплъэ ныбжьыщIэ гуп олимпиадэм зэрызыхуишэсам, дэтхэми зы ехъулIэныгъэ гуэр абы зэрыщиIэнум, - итщ тхыгъэм.

Апхуэдэу ныбжьыщIэхэм псалъэ гуапэ жраIащ УФ-м и Президентым и лIыкIуэу Ипщэ федеральнэ округым щыIэ Устинов Владимир, УФ-м и Федеральнэ Зэхуэсым и Федерацэм хэт Клишас Андрей, УФ-м и Егъэджэныгъэмрэ щIэныгъэмкIэ и министрым и къуэдзэ Афанасьев Дмитрий, Росфинмониторингым и унафэщI Чиханчин Юрий сымэ.

Олимпиадэр махуэ зыбжанэкIэ екIуэкIащ. Абы къриубыдэу студентхэмрэ еджакIуэхэмрэ я зэфIэкI щагъэлъэгъуащ унэтIыныгъэ зэхуэмэдыхэм. Ахэр упщIэ-жэуап, зэпсэлъэныгъэ, мастер-класс жыпхъэм тету екIуэкIащ.

Зэпеуэм кърикIуахэр къыщапщытэжым цIыху 20-м ехъулIэныгъэ лъагэхэр къагъэлъэгъуауэ къыхагъэщащ. Ди гуапэ зэрыхъунщи текIуахэм яхэтщ ди лъахэгъу щIалэ, УФ-м и Президентым и деж щыIэ Финанс университетым щеджэ Джэдгъэф Залымджэрий.

- ФIыщIэ яхузощI Iуэху щхьэпэр къызэзыгъэпэща псоми, къыхэтха IэщIагъэм и щэхухэм дыхэгъуэзэнымкIэ икъукIэ IэмалыфIщ апхуэдэ зэпеуэхэр, - жеIэ Залымджэрий. - ГъэщIэгъуэну икIи щIэщыгъуэу екIуэкIащ олимпиадэр, лэжьыгъэм фIыуэ хэзыщIыкI IэщIагъэлIхэм я Iуэху еплъыкIэхэм, гупсысэхэм куэдым дыхуаущиящ, гушхуауэ ипэкIэ дызэрыкIуэтыным дытрагъэгушхуащ.

Зэхьэзэхуэм къыдэкIуэу ныбжьыщIэхэм я нэгуи зрагъэужьащ. Абыхэм зыщрагъэплъыхьащ Къуэбыдэ аузым къыщызэрагъэпэща «Си Урысей» этнопаркым, спорт зэпеуэхэм хэтащ, концерт ирагъэплъащ.

ЩХЬЭЩЭМЫЩI Изэ.