Тюнене Чегем районда жангы теплица комплексни къурулушу башланнганды. Аны къууанчлы халда ачыу жумушха КъМР-ни Башчысы Казбек Коков, къырал ведомстволаны таматалары, башха регионладан келген къонакъла да къатышхандыла.
«Парник» комплекс 100 гектарда къураллыкъды. Проектине кёре аны 37,6 гектар аллыкъ биринчи кесегини къурулушуна 7,6 миллиард сом къоратыллыкъды. Ол 2023 жылда биринчи кварталда ачылыргъа керекди. Къалгъан тийреде уа теплицаланы 2024 жылны ахырында (ала 62,4 гектарны аллыкъдыла) ишлетип башларгъа дейдиле.
Комплексни «Экокультура» компания ишлейди. Аны кёп регионлада теплицалары барды. Эм уллусу 155 гектардан артыкъды, кеси да къоншу Ставрополь крайдады. Компанияны башчысы Александр Рудаков айтханыча, Москва, Тула эм Воронеж областьлада быйылны ахырына дери быллай мюлкле алгъан жерле энтта да 101,48 гектаргъа кёбейирикдиле. «Теплицаларыбыз бир жылгъа бадыражанладан 250 мингден артыкъ тонна бередиле. Биз аланы 50 гибридин ёсдюребиз. Производствода бир тюрлю агрохимикат хайырланмайбыз. 2025 жылгъа мюлклерибизни ёлчемин 1100 гектаргъа жетдирирге сюебиз. Сёзсюз, Къабарты-Малкъарда комплекс да анга иги къошумчулукъ этерикди. Эсге сала айтсам, биз мында биринчи жыл ишлемейбиз, республиканы иги билебиз, адамлары иш кёллю болгъанларын кёргенбиз», - дегенди ол.
Аны ахыргъы сёзлерине Казбек Коков да шагъатлыкъ этгенди: «Керти да бизни эм уллу онгларыбыздан бири – иш кёллю, къармашыулу адамларыбыздыла. Мен да сизге хош келигиз дейме, ишни башлагъаныгъыз бла алгъышлайма. Быллай магъаналы инвестицияла республикагъа керекдиле. Бу проект да къыйматлы болуруна ишексизме, мындан арысында бирге энтта да кёп тюрлю ахшы башламчылыкъла къурарбыз деп ышанама».
Компанияны келечилери айтханларына кёре, бир тюрлю чырмау болмаса, ала теплицаланы болжалындан алгъаракъ ачаргъа умут этедиле. Дагъыда аланы ичлеринде талай жерледе наныкъла ёсдюрюллюкдюле. Иш тап барса, быллай юлкюлеге асламыракъ тийре бёлюнюрюкдю. «Россей Федерацияда сатылгъан наныкъланы 90 проценти тыш къыралладан келеди. Бадыражанладан 500 минг тоннасы да импорт продукцияды. Кесигиз кёресиз ишлейме дегеннге нечик уллу онгла болгъанларын», - деп чертгенди Александр Рудаков.
Инвестиция проектни бардырыу жаны бла умутланы юсюнден Келишиулюкге КъМР-ни эл мюлк министри Хасан Сижажев бла «Парник» комплексни башчысы Валерий Котик къол салгъандыла. Ызы бла Казбек Коков бла Александр Рудаков теплицаланы мурдор ташыны аллында къызыл тасманы кесгендиле.
Бюгюнлюкде республикада быллай мюлкле битеу да 27 гектарны аладыла. Алада 24-25 минг тонна продукция ёсдюреди. Бу комплекс а ал кезиуде жыл сайын бадыражанладан 20 минг тонна берип турлукъду. Дагъыда бир игиси анда биринчи кезиуде 648 ишчи жер къураллыкъды.
