КъБР-м и Iэтащхьэм и пщэрылъкIэ, КъБР-м Ухуэныгъэмрэ псэупIэ-коммунальнэ IэнатIэмкIэ и министерствэр, «Экологистика» щIыналъэ операторыр и гъусэу, елэжьащ кIэрыхубжьэрыхур зэрыдаш техникэхэм я бжыгъэм зэрыхагъэхъуэну щIыкIэм.
Абы кърикIуаращи, щIыналъэ операторым иджыблагъэ къыIэрыхьащ кIэрыхубжьэрыхур зэрыдаш техникэщIэу 7. Машинэхэр щылэжьэнущ мыпхуэдэ техникэр щымащIэ районхэм.
- Техникэм я бжыгъэм хэхъуэмэ, шэч хэмылъу, нэхъыфIу зэфIагъэкIыфынущ кIэрыхубжьэрыхур зэрыдашым ехьэлIа Iуэхутхьэбзэхэри. ШыщхьэуIум икухэм иджыри машинэшхуэу 3 къытIэрыхьэну дыпоплъэ, ахэр ятещIыхьауэ щытынущ ухуэныгъэ кIэрыхубжьэрыхухэр, жыг къудамэхэмрэ къуацэ-чыцэхэмрэ дэшы-ным. КъищынэмыщIауэ, ди мурадщ иджыри техникэ 11 къэтщэхуну, - жиIащ КъБР-м ухуэныгъэмрэ псэупIэ-коммунальнэ IэнатIэмкIэ и министрым и къуэдзэ Котченкэ Роман.
КIэрыхубжьэрыхур зрадзэ контейнерхэр ирикъуу щIыпIэхэм щыгъэувынми зэман гъунэгъум елэжьынущ. Псалъэм папщIэ, литр 1100-рэ зэрыхуэн апхуэдэ контейнеру мин къащэхуну я мурадщ. Аруан, Бахъсэн районхэм кIэрыхубжьэрыхур щызэхадз я щIыпIэхэм папщIэ хьэлъэр къэзыIэт, къезыхьэкI техникэхэм хуэдэу 4 зэрагъэпэщынущ. Апхуэдэуи Аруан районым полигоным щылэжьэну къащэхунущ зы бульдозеррэ зы экскаваторрэ.
Нэхъ ипэкIэ апхуэдэ техникэр зэрахуримыкъум къыхэкIырт кIэрыхубжьэрыхур зэтрихьэныр. Иджы щытыкIэм зихъуэжыну щогугъ.
