Налшык къалэ клиникэ сымаджэщ №1-м и ухуэныгъэхэм ящыщу къати 8-уэ зэтет унэр коронавирус узыфэ зэрыцIалэм щеIэзэ госпиталу къызэрызэIуахыным хуагъэхьэзыр. Лэжьыгъэр зэрекIуэкIыр зригъэлъэгъуащ КъБР-м узыншагъэр хъумэнымкIэ и министр Къалэбатэ Рустам.
Мы зэманым иужь итщ КТ зэращI, диагностикэ аппаратхэр зыщIагъэувэну пэшхэр зыхуей хуэгъэзэ-ным, медицинэ IэмэпсымэщIэхэр зыгъэлэжьэну ток кIапсэхэр щхьэхуэу къыхэшыным. Апхуэдэу министрым зыщигъэгъуэзащ сымаджэщым и кислород станцхэм я лэжьэкIэм. Нэхъапэм сымаджэщым и корпусхэм я станцхэр зэхэхауэ щытащ, иджы ахэр псори зэхагъэхьэжащ.
КъищынэмыщIауэ, сымаджэщым щагъэуващ кислород гъэтIылъэхэр зэрыт хъумапIэхэр. Апхуэдэхэр яIэщ республикэм и госпиталищым. КъБР-м Узыншагъэр хъумэнымкIэ и министерствэм ахэр къищэхуауэ щытащ республикэм и Iэтащхьэ КIуэкIуэ Казбек и унафэкIэ щIыналъэ бюджетым къыхагъэкIа мылъкумкIэ.
Сымаджэщым и лифтхэри яхъуэжащ. Япэм тIу яIэу щытамэ, иджы абы къыхэхъуащ сымаджэ хьэлъэхэр къызэрырашэкIын лифтри. ИджыпстукIэ лажьэр зыщ, мыгувэу адрей тIури яутIыпщынущ.
Министрыр арэзы къищIащ зэгъэпэщыжыныгъэ лэжьыгъэхэр щIэгъэхуэбжьауэ икIи фIагъ иIэу зэрекIуэкIым.
