|
|
Тындырылгъан жумушланы эсеплегендиле, мындан ары да жетишимле тежегендиле
4 декабря, 2018 - 07:10
Россейни илмула академиясыны Къабарты-Малкъарда арасы бу кюнледе кесини 25-жыллыкъ юбилейин белгилейди. Анга жораланнган жумушла бир ыйыкъны ичинде Нальчикде бардырыллыкъдыла, ол санда кёрмючле, илму конференцияла бла семинарла.
Тюнене уа Къырал концерт залда юбилейни чеклеринде къуралгъан кёрмюч кесини ишин эрттенликден окъуна башлагъан эди. Анга республиканы илму коллективлери къатышып, келген къонакълагъа кеслерини жетишимлерин кёргюзтгендиле.
Ызы бла уа жыйылыу да болгъанды. Анга КъМР-ни Башчысыны къуллугъун болжаллы халда толтургъан Казбек Коков, Правительствону Председатели Мусукланы Алий, КъМР-ни Парламентини Председателини орунбасары Жанатайланы Салим, РАН-ны вице-президенти Юрий Балега къатышхандыла.
Жыйылыуну профессор Пётр Иванов ачханды эм бардыргъанды. Кесини къысха сёзюнде ол махкемеде къаллай магъаналы ишле тамамланнганларыны юсюнден билдириу этгенди. Андан сора Казбек Коков алимлени, къонакъланы да байрам бла жюрегинден алгъышлагъанды, мындан ары да жетишимлери кёп болурларына ийнаннганын билдиргенди.
- Сиз кесигизни Шимал Кавказда къыйматлы ишлеген илму араныча кёргюзталгъансыз къысха заманны ичинде. Бюгюнлюкде бийик квалификациялы специалистле хазырлау жаны бла бек кючлюледен бирисиз. Ол а, мен оюм этгенден, бир ызны тутхан, ишлерине толусунлай берилген алимлени кючлери бла болгъан жетишимди. Сынамлы специалистле жаш тёлюден билимлерин къызгъанмай ишлегенлери баямды. Ол а мындан ары да иш тохтамай айнып барлыгъыны шартыды, - деп чертгенди Казбек Коков.
Аны ызындан сёз РАН-ны вице-президенти Юрий Балегагъа берилген эди. Ол, алимлени бу байрамлары бла Россейни илмула академияны председатели Александр Сергеевни атындан алгъышлап, коллективни Академияны грамотасы бла саугъалагъанды. Андани сора КъМР-ни Правительствосуну, Парламентини эм Академияны кесини Сыйлы грамоталары эм Ыспас къагъытлары бла алимлени бир къаууму белгиленнгендиле. Аланы Мусукланы Алий бла Жанатайланы Салим да саугъалагъандыла эм мындан ары да бийик жетишимлери бла Къабарты-Малкъарны атын айтдыргъанлай турлукъларына ийнаннганларын билдиргендиле.
 |
|
18.07.2026 - 09:03 Тырныауузда хыйлалыкълагъа къажаулукъну жорукъларын ангылатыу жумушла болгъандыла. |
 |
|
17.07.2026 - 12:35 «Таулу» («Горец») медиа ара Кёнделенни Доттуланы Ахмат атлы 1-чи номерли школунда башланып, аны жаш журналистлери тюрлю-тюрлю конкурслагъа, тюбешиулеге, жыйылыулагъа къатыша, проектле хазырлай, ат |
 |
|
17.07.2026 - 09:03 Жаш тёлюге билим бериуде ишлей, жетишимли болгъанларыбыз асламдыла. Аладан бири Моллаланы Мариям бюгюнлюкде Нальчикни 32-чи номерли мектебинде орус тилден бла литературадан окъутады. |
 |
|
16.07.2026 - 08:53 Тюнене КъМР-ни Башчысы Казбек Коков КъМР-де ич ишлени министри Вячеслав Крючков, КъМР-ни транспорт эмда жол мюлк министри Аслан Дышеков, республиканы цифралы айныу, связь эмда асламлы коммуникациял |
 |
|
16.07.2026 - 08:51 Ахыр кюнледе социал сетьледе Къабарты-Малкъарда жашырын мобилизация бардырылады, региондан келишим бла аскерде къуллукъ этерге чакъырылгъанланы планы он кереге кётюрюлгенди, деген хапарла жюрюйдю |
|
