КъМР-ни Башчысы Казбек Коков тюнене республиканы жаш алимлерини къаууму бла тюбешгенди. Анга жарыкъландырыу, илму эмда жаш тёлюню ишлери жаны бла министрни къуллугъун толтургъан Анзор Езаов, окъуу юйлени, илму бла кюрешген махкемелени келечилери къатышхандыла.
Казбек Валерьевич, жыйылгъанланы алларында сёлеше, жыл сайын быллай тюбешиуню къурау энди ахшы тёреге айланнганын билдиргенди. Сегизинчи февральда Россейни алимлери кеслерини профессионал байрамларын белгилегенлерин эсгертип, залдагъыланы барысын да аны бла алгъышлагъанды. Быйыл «Илмуну эмда технологияланы жылы» деген белги бла бардырыллыгъын айта, ол экономикада бютюнда айныуну жолун ызларына ышаннганын билдиргенди.
Андан сора да, илму жамауатны жашаууну качествосун игилендирирге къуллукъ этерге тийишлисин черте, 2030 жылгъа Россей Федерация дунияда бу жаны бла тутхучлу излем ишлери аслам санда болгъан он къыралны тизмесине тюшерча борчла салыннганларын да айтханды. Алай эсе уа, регионла да кеслерини жанындан ол затха къошумчулукъ этерге тийишли болгъанларын ангылатханды.
Бу теманы андан ары бардыра, бизде да Москвадан, Санкт-Пебербургдан, Новосибирскден кем болмай илму бла кюреширча, аны айнытырча онгла, мадарла этилирге кереклисин да айтханды. Республика жаш алимлени кёллендирирча амалланы излегенин, алагъа премияла, грантла тохташдыргъанын эсгертгенди.
Быйыл январьдан башлаб а аспирантлагъа стипендияны ёлчеми он мингнге жетгенин да билдиргенди. Ызы бла ала бла быллай форматда тюбешгенине къууаннганын жашырмай, жаш адамланы аланы кёллендирген неда жарсытхан проблемала, илму бла байламлы да соруула берирлерине ыразылыгъын ангылатханды.
КъМР-ни Жаш алимлерини эмда специалистлерини советини председатели Алексей Абазов, тюбешиуде сёлеше, сагъынылгъан совет 2009 жылда къуралгъанын, аны къауумунда бюгюнлюкде 23 къыз бла жаш болгъанын билдиргенди. Аланы санында уа илмуланы бир доктору, он а кандидаты барды. Бу жаш адамла тюрлю-тюрлю грантланы да алгъандыла. Совет жыл сайын (бу кюнледе да) КъМКъУ-да бардырылыучу «Шаг в науку» деген халкъла аралы конференцияны къурагъанладан бириди.
Алексей Хасанович республиканы оноучусуна жаш алимлени кёллендирген программала ючюн ыразылыгъын билдиргенди. Ызы бла мындан арысында да цифровизациялы ёмюрню кезиуюнде аланы жазгъан илму ишлери дуния эмда халкъла аралы даражалы базалагъа кирген изданиялада басмаланырына къайгъырыулукъ этилсе, тюз боллугъун ангылатханды.
Тюбешиуде публикацияла бла байламлы соруула дагъыда берилгендиле. Жаш адамла монографияланы, коллектив хазырлагъан уллу ишлени илму махкемелени кеслеринде чыгъарыу танг кесек проблема бла байланып къалгъанына жарсыгъандыла. Дагъыда бирсилери социал болушлукъну, аны ёлчемлерини юслеринден да сёлешгендиле. Башхалары уа спорт инфраструктураны, жолланы ишлеуню, илму бла иш бериучюлени байламлыкъларыны проблемаларын да кётюргендиле.
Казбек Коков илмуну айныу жолларыны юсюнден айтхан заманда ол энчи экологияны, медицинаны, туризмни, IT-технологияланы, эл мюлкню, полимерлени, билим бериуню жангыча ишлеуню ызына чыгъарлыкъ тинтиулени сакълагъанын ангылатханды. Алай эсе да, битеу да тамамланнган жумушла экологиягъа заран келтирмезча болургъа тийишлиликлерин белгилегенди. Эндиге дери да федерал даражада къуралгъан проектлеге, программалагъа жаш тёлюбюз къалай къатыша келген эсе да, мындан арысында да къызла бла жашла алада кеслерини хунерлерин ачыкълаялырча онгла этилгенлей турлукъларын да чертгенди.
Казбек Валерьевич республикада, къыралда да илму айныр эмда ол дуния даражада ал сатыргъа чыгъар ючюн эм алгъа билим бериу сфера качестволу болургъа кереклисине толусунлай ийнандыргъанды. Окъуулу, билимли жаш тёлюбюз федерал  даражалы конференциялагъа, конкурслагъа, проектлеге къатыша, саулай да Росейни да бу ызда кючлендиргенин къатлагъанды эмда жыйылгъанланы барысына да жангы жетишимле тежегенди.