УФ-м и Конституцэм халъхьа зэхъуэкIыныгъэхэм ящыщщ Къэрал советыр щIэрыщIэу зэрагъэпсынур. ЗэрыфщIэщи, ар къызэрызэрагъэпэщрэ илъэс 20 хъуащ, ауэ абы хэтынумкIи и къалэну щытынумкIи иджы нэгъуэщI хъуащ.
Къэрал советым и унафэщIыр Президентращ. Советым цIыхуищэ хэтщ: щIыналъэхэм я унафэщIхэр, Правительствэм, ФедерацэмкIэ Советым, Къэрал Думэм, Профсоюз щхьэхуитхэм я федерацэм, нэгъуэщI къэрал IуэхущапIэ инхэм я унафэщIхэр. Советращ къэрал унафэр зыIэщIэлъ IуэхущIапIэ псоми я лэжьыгъэр зыубзыхунур. Мыбдежращ губернаторхэмрэ щIыпIэ унафэщIхэмрэ я лэжьыгъэр къыщапщытэнури. Ар комиссэ щхьэхуэм и къалэну щытынущ. А комиссэращ зи Iуэхухэр тэмэму кIуатэ щIыналъэхэмрэ муниципалитетхэмрэ нэхъри зэрызыщIагъэкъуэнум и унафэр зыщIынур, щIыналъэхэм я бюджетхэр зэгъэзэхуауэ къащтэным зи нэIэ тезыгъэтынур. Къапщтэмэ, комиссэхэр 18 мэхъу, къэралымрэ абы и цIыхухэмрэ я щыIэкIэ-псэукIэр зыубзыху Iуэхухэр ятегуэшауэ.
Мы комиссэхэмрэ министерствэхэмрэ, псалъэм папщIэ, узыншагъэр хъумэнымкIэ, щэнхабзэмкIэ, нэгъуэщIхэмкIи щыщыIэкIэ, зэран зэхуэмыхъуну пIэрэ, жаIэу упщIэ къэзыгъэуви щыIэщ, ауэ къэралым, щIыналъэхэм я унафэщI нэхъыщхьэхэр зы утыкум щызэпсэлъэну, щызэчэнджэщыну, унафэ къыщащтэну Iэмал зэраIэнум фIы къыпэкIуэну дыщыгугъынщ.
