Былтыр Къабарты-Малкъарда сют малчылыкъ бёлюмде къармашхан мюлклени барысы да бирге 537,5 минг тонна сют сатхандыла. Буруннгу жыл бла тенглешдиргенде, ол 104,5 процентге кёпдю, деп билдиредиле Кавказстатдан.
Производствону жетишимлигини баш сылтауларындан бири иги кесек къумалы ийнек хайырланнганыны эм мал ашны да качествосуна аслам эс бурулгъаныды. Бюгюнлюкде мюлкледе 271,2 тууар мал саналады, ол санда 134,8 минг ийнек. Анга кёре 1 процент ёсюм эсленеди. Орта эсеп бла алып айтханда, былтыр бир ийнекден 6334 литр неда буруннгу жылдан 12,6 процентге кёп сауулгъанды.
Кёп болмай Сют производство бла кюрешген миллет союзну XII съездине РФ-ни эл мюлк министри Дмитрий Патрушев да къатышханды. Ол озгъан жылда саулай къыралда 32 миллион тонна сют сатылгъанын, ол а буруннгу жылдан эсе 855 минг тоннагъа аслам болгъанын, мындан арысында да бёлюм жетишимли ишлерча тутхучлулукъ этиллигин билдиргенди.
Къабарты-Малкъарны малчылары да бар амалны, ол санда къырал болушлукъну себеплиги бла, быйыл сютню аслам алыргъа таукелдиле. Эсге сала айтсакъ, былтыр сют бла кюрешген фермерлеге болушлукъгъа бюджетден 151,3 миллион сом субсидия берилгенди. Андан 140,7 миллион сом федерал эм 10,6 миллион сом да республика кесинден къошхан ахчады.
Бюгюнлюкде бёлюмде къармашханланы льготалы ёнкюч алыргъа, комплекслерини къурулушлары бла байламлы къоранчларыны бир кесегин жабаргъа да онглары барды.
