КъМР-ни Башчысы Казбек Коков Прохладна муниципал районнга эм Прохладный шахар округга иш бла баргъанды. Жолоучулукъда биргесине къурулуш эм ЖКХ министр Алим Бербеков, транспорт эм жол мюлк министр Аслан Дышеков, маданият министр Мухадин Кумахов, спорт министр Ислам Хасанов, Прохладна муниципал районну жер-жерли администрациясыны таматасы Андрей Журавлев, Прохладный шахар округну жер-жерли администрациясыны таматасы Игорь Тараев, подряд организацияланы оноучулары болгъандыла.
Республиканы Башчысы алгъын берилген буйрукъланы толтурулгъанларына эс бургъанды. Алай бла Къарагъач элде «Спорт – жашау жорукъ» федерал проектге кёре мында жашагъанланы тилеклери бла ишленнген Физкультура-саулукъ кючлеу комплексге къарагъанды. Жыйылгъанла жаш тёлю энди спорт бла тири кюреширча болгъанына ыразылыкъларын билдиргендиле. Казбек Коков, иш мындан арысында да бардырылгъанлай турлугъуна ышандырып, планла кёп болгъанларын эм аланы толтурургъа онгла чыкъгъанларын белгилегенди.
Солдатская станицада Искусстволаны сабий школасына «Маданият» миллет проектни чеклеринде тынгылы ремонт этилгенди. Устазла да жангы болумлада ишлерге, сабийлени юйретирге бютюн кёлленнгенлерин айтхандыла. Казбек Валерьевич 250 жери болгъан жангы битеулю билим берген школда да болгъанды, ол «Билим бериу» миллет проектни чеклеринде ишленнгенди. Анда жашагъанланы тилеклери бла 140 жери болгъан сабий садны къурулушу башланнганды.
Пролетарское элде юч объектге къаралгъанды. Регионну оноучусу Маданият юйню тынгылы ремонту къалай бардырылгъанына эм «Тапландырылгъан шахар болумла» федерал проектге кёре кёп фатарлы сегиз юйню арбаз тийрелери къалай айбатландырылгъанларына эс бургъанды. Ол КъМР-ни жол фондуну ырысхысына ремонт этилген автомобиль жолланы халларына да къарагъанды.
Мында жашагъанланы кёп жылладан бери къыйнагъан жарсыуладан бири суу бла жалчытыу осал къуралгъаны болгъанды. Ол жаны бла иш «Таза суу» миллет проектни чеклеринде башланнганды. Дальнее, Псыншоко элледе, Солдатская станицада жангы суу баргъан ызла къуралгъандыла, Заречное, Алтуд, Ульяновское, Красносельское элледе суу баргъан ызла тапландырылгъандыла, Лесное, Заречное элледе суу чыгъарылгъан скважинала ишленнгендиле. 2021-2022 жыллада Къарагъачда жангы водопроводну ишлеу, Пролетарское элде, Прималкинское элде, Ново-Покровский хуторда суу баргъан ызланы реконструкциясы эм бир ненча башха журтда жангы скважиналаны къурулушлары белгиленнгенди.
2020 жылда шахар тийресинде талай социал объект жашаугъа кийирилгенди. Прохладный шахар округну эм Прохладна муниципал районну Ара район больницасыны беш этажлы шёндюгюлю излемлеге келишген 180 жатхан жери болгъан корпусу ишлеп башлагъанды, 11-чи, 8-чи номерли школланы школгъа дери билим берген бёлюмлерини мекямларына 40-шар жерлери болгъан эки ясли группа блок хайырланыугъа берилгенди, юч ясли группа ачылгъанды. Гагарин атлы орамда сабий спорт-саулукъ кючлендириу эм воркаут зонасы бла кёп функциялы оюн майдан ишленнгенди. «Северный» микрорайонда газопровод ишленеди.
Быйыл тамамланырыкъ ишле бла байламлы республиканы Башчысы Свобода орамны Свято-Никольский храмны къатларында тапландырыргъа умут этилген жамауат тийреге къарагъанды. Алгъаракълада мында башындагъы паркны тийресинде сквер эм «Дружба» районда майдан игилендирилгендиле, анда фонтанла къуралгъандыла. Дагъыда онбир кёп фатарлы юйлени тогъуз арбаз тийрелери айбатландырылгъандыла.
Жоллагъа энчи эс бурулгъанды. 2020 жылда Алтуд элге баргъан Прохладна-Бахсан автомобиль жоллада жангыртыу ишле озгъандыла, Прималкинскоеде 4,1 километр узунлукъда тышында жарыкълыкъ берген ызла тартылгъандыла. Жаяу баргъанла ётген 20 жер къуралгъанды. Жер-жерли магъанада болгъан 4,3 километр автомобиль жолла тап халгъа келтирилгендиле. 2021-2022 жыллада регион магъаналы болгъан автомобиль жоллагъа 117 миллион сом бёлюнюрюкдю. Муниципал жоллагъа КъМР-ни жол фондундан 160 миллион сом чакълы бёлюннгенди, битеулю узунлукълары беш километр болгъан Головко орам эм анга къошулгъан тийреле тийишли халгъа келтирилликдиле. Саулукъ сакълауну биринчи звеносун игилендириу программагъа кёре 2022-2024 жыллада Ара район больницаны поликлиника бёлюмюню эм Красносельское бла Янтарное элледе амбулаторияланы къурулушлары пландадыла.
Жолоучулукъну эсеплерине кёре кенгешни чегинде районну эл мюлк бёлюмюню айныуу, социал блокну учрежденияларыны материал-техника къолайлыкъларын кючлеу, саулукъ сакълауну биринчи звеносун игилендириу соруула сюзюлгендиле. Жууукъ жыллада Прималкинское элде сабий садны къурулушу планнга салыннганды. Келир жылда «Билим бериу» миллет проектни бардырыуну чеклеринде Прохладный шахарда 785 жери болгъан жангы мектеп уллу объектге саналлыкъды. Казбек Коков, аны орналлыкъ жерине къарап, жууаплы министрлеге, жер-жерли администрацияны таматасына толтурулгъан ишлени качестволарына эм заман болжалларына къарагъанлай турургъа буюргъанды, Прохладный-Майский жолну бир тийресини тапландырыу проектине да эс бурууну излегенди.
