КъМР-ни Башчысы Казбек Коков Шимал-Кавказ федерал округда коронавирус аурууну жайылыууна къажау, иммунизацияны соруулары жаны бла кенгешни ишине къатышханды. Аны РФ-ни Президентини СКФО-да толу эркинликли келечиси Юрий Чайка бардыргъанды.
Аны ача, полпред округда эпидемиология болум алыкъа къыйын болгъанын чертгенди: «Ыйыкъны аллында болгъан шартлагъа кёре, округда бу ауруу 142 минг адамгъа жукъгъанды, ол а халкъны 1,5 проценти тенгли бирди.  Пандемияны аллындан бери инфекция жугъуп, 2849 адам ёлгендиле. Ауругъанланы 74 процентине медицина болушлукъ юйлеринде бериледи. Округну субъектлеринде вакцина салдырылгъан  141 жер барды. Бюгюнлюкде жеринден кёчюрюлген пунктланы къурау иш бардырылады», - дегенди ол.
Вакцинация округда къалай бардырылгъаныны юсюнден властьны федерал органларыны келечилери бла регионланы оноучулары докладла этгендиле. Юрий Чайка, алагъа тынгылап, къыралны башчысыны  толу эркинликли келечисини Аппараты Россейни Президентини буйрукъларын субъектледе толтурургъа  не жаны бла да болушургъа  хазыр болгъанын чертгенди. Буйрукъла къалай тамамланнганлары уа контрольгъа алыннганды.
Кенгешде белгили этилген шартланы юслеринден оюмун айта, Казбек Коков: «Къабарты-Малкъарда эпидемиология болумну игилендириу жаны бла мадарла андан ары толтуруладыла. Республикада коронавирусха къажау вакцина 2842 адамгъа этилгенди, дарман энтта келтирилирин сакълайбыз»,-дегенди.  
 Бюгюнлюкде уа республикада вакцина салдырылгъан 32 жер къуралгъанды, ала битеу шахар округлада бла муниципал районлада бардыла. Организациялагъа барып, уколну  жеринде салгъан  къауумла да ишлеп башлагъандыла. Республикада коронавирус жукъгъанына ишеклилеге медицина болушлукъ берилген 6 амбулатория ара барды. Ауруу ачыкъланнганланы саны азайгъаны бла байламлы эки госпитальны иши тохтатылгъанды – Нальчикде 2-чи номерли клиника больницада бла Республикалы сабий клиника больницада. Къалгъан 7 госпитальда вирус жукъгъанлагъа медицина болушлукъ андан ары берилликди.