Журналистни иши мамыр жашауда окъуна къыйынды, бирде уа къоркъуулугъа да саналады. Ахыр жыйырма-отуз жылны ичинде къыралда профессионал борчларын толтура бизни бир ненча жюз коллегабыз жоюлгъанды. Бирлери аскер къаугъалада, башхалары аманлыкъчыланы къолларындан. Аланы атлары келир тёлюлени да эслеринде къалырча кёп жерледе, ол санда Терс-Къолда да эсгертмеле орнатылгъандыла.
Алай бла Кавказда жоюлгъан журналистлеге аталгъан эсгертмени къатында тюнене тёрели жыйылыу бардырылгъанды. Тёрели деп нек айтабыз десегиз, ол жыл сайын декабрьни бу кюнлеринде ётеди. Ары келгенле, ол санда къырал оноучула, аскер структураланы эмда бюджет организацияланы келечилери, школчула эм башхала, профессионал борчларын толтургъан кезиуде дунияларын замансыз алышхан журналистлени эсге тюшюрюп, эсгертмеге гюлле салгъандыла.
Къабарты-Малкъарны Журналистлерини союзуну правленини башчысы Шауаланы Разият сёзюн бу эсгертмени тарыхындан башлагъанды. Аны орнатыргъа оноу 1991 жылда Россейни Журналистлерини союзуну башламчылыгъы бла этилгенди. Жерин а Минги тауну этеклерин Уллу Ата журт урушну кезиуюнде немислиледен къутхаргъан аскерчилерибизни эсгертме комплексини онг жанында 1997 жылда тапханды. Аны юсюнде «1994-1996 жыллада Кавказда жоюлгъан журналистлеге» деп жазгъандыла.
Шауаланы Разият билдиргеннге кёре, жаланда Терс-Къолда угъай, къыралда талай регионда да бардыла быллай жерле. Бу кюн алагъа кёпле барып, бирлери – коллегаларын, башхалары уа, танымай эселе да, тюзлюкню юсюнден терсине бурмай айтыргъа, жазаргъа эмда кёргюзтюрге итиннгенлени эсгередиле. Мындагъы эсгертме уа, айтханыбызча, Кавказда жоюлгъан журналистлеге аталгъанды. Аланы юсюнден ёсе келген тёлюге да айтып турургъа кереклисин белгилегенди Разият.
Ызы бла Элбрус районну администрациясыны башчысына Залийханланы Къаншаубийге, ВГТРК-гъа, республиканы Культура министерствосуна, Россейни Журналистлерини союзуна да ыразылыгъын билдиргенди. «Аланы болушлукълары бла быйыл эсгертмени жангыртып, жерине орнатыргъа къолдан келгенди», - дегенди ол.
Залийханланы Къаншаубий да кеси жанындан бу ишни магъаналыгъын чертгенди. «Бюгюн биз тюзлюкню жолундан таймай ишлеген, жашаулары юзюлген журналистлени эсге тюшюребиз. Аны айтханда, биз аланы юслеринден, аны бла уа мамыр эмда къаугъалы кезиуледе, урушлада, жашауда не ишле болгъанларын ёсе келген тёлю да билсе сюебиз», - деп къошханды.
-Адамны аты сагъыныла тура эсе, ол саугъа саналады, - дегенди жыйылыугъа къатышхан росгвардиячыладан бири, сержант Куканькова Валентина. – Бу эсгертме анга шагъатды. Чынтты патриотла, таукел эм батыр, тюзлюкню кёплеге билдирген, ол ызда бара жашаулары юзюлген адамладыла ала.
Жыйылыугъа къатышыргъа онглары болмагъан коллегаларыбызны юслеринден да сагъыннгандыла ары келгенле. Жарсыугъа, шёндюгю пандемия кёплеге къаугъалы, уруш кезиуча окъуна болгъанды. Шауаланы Разият билдиргеннге кёре, быйыл жаз башындан бери республикада коронавирус аурууну хатасындан онтёрт журналист ёлюп кетгенди. Саулай къыралда уа аланы саны жарым мингнге жетгенди. Жер башында къуруда кече не кюн болуп турмаучусун эсгерип, биз да бу къыйын кезиу кёпге созулмай тауусулур деп ышанабыз, саулагъа уа кийик саулукъ эмда узакъ ёмюр тежейбиз.