КъМР-ни Башчысы Казбек Коков школчуланы арасында «Уллу перемена» битеуроссей конкурсда хорлагъанла эм финалына чыкъгъанла эмда аланы юйретгенле бла тюбешгенди. Жыйылыугъа жарыкъландырыу, илму эм жаш тёлюню ишлери жаны бла министрни къуллугъун толтургъан Анзор Езаов да къатышханды. Жашланы бла къызланы жетишимлери бла алгъышлай, республиканы оноучусу ала республиканы быллай бийик даражада белгили этгенлери ючюн ыспас этгенди, устазларына уа ёсюп келген тёлюню юйретиуде къыйынлары ючюн ыразылыгъын билдиргенди.
КъМР-ни Башчысы бла ачыкъ ушакъны кезиуюнде школчула бла устазла конкурсну юсюнден оюмларын айтхандыла, шёндю жарсытхан сорууланы белгили этгендиле эмда мындан ары не бла кюреширге сюйгенлерин билдиргендиле. Сёз Къабарты-Малкъарда битеулю эм къошакъ билим бериуню айнытыуну, усталыкъны сайлауну, туризмни, инновация технологияланы юслеринден да баргъанды.
Казбек Коков бюгюнлюкде, технологияла терк айныгъан заманда, КъМР-ни власть органлары жаш тёлюню жашау салгъан жангы излемлеге хазырлау, жамауатда, дунияда бола тургъан тюрлениулеге юйретиу баш борчларындан бирлери болгъанын чертгенди. Ол мурат бла хар сабийни да фахмусун ачыкъларгъа, чыгъармачылыкъ онгларын айнытыргъа, проектлени жарашдырыргъа юйретирге, предпринимательликни энчиликлерин билдирирге тийишлиди.
-Биз ёсюп келген тёлюню шёндюгю заманны излемлерине хазыр этерге керекбиз. Сиз а бу магъаналы ишде бизни болушлукъчуларыбызсыз, - дегенди Казбек Коков. Регионну оноучусу конкурсха къатышханлары эм анда хорлагъанлары, алгъан сынаулары эм билимлери бла школчула, аланы устазлары бюгюн окъуна тёгерекде дунияны тюрлендирип башлагъанларын да айтханды: «Тирилигигиз, окъуугъа итиниуюгюз, юйюрюгюз, школугъуз, республикабыз, къыралыбыз ючюн къазауат этип кюрешгенигиз ючюн сау болугъуз», - деп къошханды Казбек Коков.
Устазла бла сабийлени юйретгенле конкурсха хазырланыу къалай баргъаныны, сабийле кёл салып кюрешгенлерини, билим бериуде проект ишни андан ары айнытыргъа кереклисини юслеринден айтхандыла. Дагъыда школчулагъа бла студентлеге проектлерин КъМР-де тамамларгъа онгла берирге кереклисин, регионда устазланы араларында конкурслагъа, сёзге педагогика вузланы студентлерини араларында бардырылгъан «Келир заманны устазы» конкурсха, сейирни къозгъаргъа тийишли болгъанын да чертгендиле.
Устазла республиканы оноучусуна тюбешиу къуралгъаны ючюн ыразылыкъларын билдирип, ол сабийлени андан ары жетишимлеге кёллендиргенин чертгендиле. «Уллу переменаны» финалына чыкъгъанла да жаш тёлюню проект ишге къатышдырыргъа, аны школ программагъа кийирирге кереклисин белгилегендиле.
Тюбешиуню ахырында Казбек Коков конкурсну финалына чыкъгъанланы, аланы устазларыны предложениялары барысы да сюзюллюклерин чертгенди эмда жаш адамлагъа мындан ары да жетишимле тежегенди.
«Уллу перемена» быйыл 28 мартда башланнганын эсгертирге тийишлиди. Анга битеу къыралдан да 1 миллиондан аслам школчу къатышханды, ол санда бизни республикадан 6 минг адам. Аны финалы 1-5 ноябрьде «Артекде» бардырылгъанды. Анга уа 1200 жаш бла къыз чакъырылгъандыла, ол санда КъМР-ден 9 школчу: Абазов Мурат (хорлагъанды), Айбазов Феликс (хорлагъанды), Асанланы Жаннет (финалгъа чыкъгъанды), Белоусова Лада (финалгъа чыкъгъанды), Бетрозова Сабина (хорлагъанды), Къулийланы Танзиля (хорлагъанды), Пшихачев Инал (финалгъа чыкъгъанды), Цой Виктория (финалгъа чыкъгъанды), Шиков Озермас (хорлагъанды).
11-чи классланы окъуучуларына саугъагъа 1 миллион сом бериледи. Бу ахчаны ала билим алыугъа къоратыргъа боллукъдула. Андан сора да, аланы жетишимлерини портфолиоларына 5 балл къошулады. Ол а вузгъа киргенде магъаналыды. 9-10 классланы окъуучулары уа 200-шер минг сом бериледи. Бу ахчаны къошакъ билимге, окъугъанда керекли гаджетле сатып алыргъа къоратыргъа эркиндиле.
Проект «Россей – онгланы къыралы» платформада бардырылады эмда школчуланы араларында тири, оюм эте билген, жангычылыкълагъа ачыкъ, окъуугъа фахмулу жашланы бла къызланы ачыкълар мурат бла къуралгъанды. Къабарты-Малкъар а конкурсну финалына чыкъгъанланы бла хорлагъанланы санына кёре Шимал-Кавказ федерал округда экинчи жерни алгъанды.
