Жыл сайын «Россельхозцентрни» республикада бёлюмюню келечилери уллу къоранчлагъа келтирирге боллукъ аурууланы, къурт-къумурсхаланы  ачыкълар муратда  дайым тинтиуле  бардырадыла.  Аны бла байламлы кёп болмай управленияны таматасы Хасанбий Курижев ишчилери  бла бирге Чегем районда «Грин ПИКъ» биригиуде болгъанды. Ала сабанлада баш къусхан «Юка» къышлыкъ будайны   болумуна къарагъандыла.   

Аны кезиуюнде хаталы ауруу табылмагъанды, будай  да кюч алгъаны белгиленнгенди. Болсада хауа болумну хатасындан  жукъгъан грибокла кенг жайылыргъа боллукълары эсге салыннганды. 

Управленияны  ишчилери жерчиликде уруннганлагъа,    къылкъылыланы аурууладан эм къурт-къумурсхаладан сакълар ючюн,  сынамлы  «Пестицидле бла агрохимикатланы къырал каталогунда» болгъан эм Россейде хайырланыргъа жарагъан  дарманла  салыргъа чакъыргъандыла. 

Курданланы Сулейман хазырлагъанды.