Налшык ЩэнхабзэмкIэ и фондым къыщызэIуахащ КъБР-м и цIыхубэ сурэтыщI Кочергин Владимир и лэжьыгъэ имыгъэлъэгъуахэм я выставкэ.
Гъэлъэгъуэныгъэм хагъэхьащ художник цIэрыIуэм и Iэдакъэ къыщIэкIа сурэтхэм ящыщу нэхъапэкIэ утыку кърамыхьахэр.
КъБР-м и СурэтыщIхэм я зэгухьэныгъэм и унафэщI Темыркъан Геннадий выставкэр къыщызэIуи-хым жиIащ гъуазджэр фIыуэ зы-лъагъухэм, сурэт щIыным зыхэзыгъэгъуазэхэм художникыр нэгъуэщI лъэныкъуэкIэ ирагъэцIыхун мурадкIэ абы и графикэхэмрэ эскизхэмрэ зэрыхагъэхьар икIи апхуэдэ сурэтыщIхэм я лэжьыгъэхэм куэдым узэрыхурагъаджэр. Темыркъаным щIигъужащ Кочергиным и апхуэдэ зы выставкэ етIанэгъи къызэрагъэпэщыну зэраубзыхуар.
УФ-м и цIыхубэ сурэтыщI, КъБР-м и Къэрал саугъэтым и лауреат, Красноярск къалэм ксилографиемкIэ студие къыщызэзыгъэпэща икIи абы и унафэщI Пащты Герман и псалъэми къыхигъэщащ Кочергиным зэфIэкI инрэ щIэныгъэ куурэ бгъэдэлъу зэрыщытар, абы и Iэдакъэ къыщIэкIахэм гъуазджэм и щэху куэд зэрыхэплъагъуэр.
Пащтым жиIащ апхуэдэ гъэлъэгъуэныгъэхэм адэкIи пащэмэ зэрыфIэфIыр, сыту жыпIэмэ, художник Iэзэ куэдым къащIэна лэжьыгъэ купщIафIэхэр утыку кърамыхьэу къэнащ. Абы и жэуапу, Темыркъан Геннадий жиIащ «Академия мастеров» проектым хыхьэу, выставкэм «Игорь Петрович Наседкин. Графика» зэхыхьэмкIэ зэрыпащэнур, я зэгухьэныгъэм фонд щхьэхуэ къызэригъэпэщу, дунейм ехыжа сурэтыщIхэм я Iэдакъэ къыщIэкIахэр ихъумэну зэримурадыр.
Налшык дэт, Сабий художественнэ школым и унафэщI Зэхъуэхъу Валерэ и еджакIуэхэр выставкэм къыздишащ икIи абы кърихьэлIахэм ехъуэхъуащ.
- Кочергин Владимир къытхэмытыжми, ар сурэтыщI гъэщIэгъуэну дигу къинэжащ. Выставкэм къызэщIиубыдэ и эскизхэмрэ графикэхэмрэ къагъэлъагъуэ абы къыщIэна творчествэр зэрызэмыфэгъур. КъБР-м и СурэтыщIхэм я зэгухьэныгъэм фIыщIэ хуэфащэщ, иджыпсту дунейм и щытыкIэр зэрыгугъум емылъытауэ, мы гъэлъэгъуэныгъэр къызэрызэригъэпэщам папщIэ. Выставкэр республикэм и щэнхаб-зэм и ехъулIэныгъэщ, - жиIащ Зэхъуэхъум.