Къабарты-Малкъарны Башчысы Казбек Коков  КъМР-ни Правительствосуну келечилери бла кенгеш бардыргъанды. Анда урунуу хакъны тёлеу системасын игилендириу, регионда орталыкъ айлыкъны кётюрюу, республиканы жамауатын иш бла жалчытыугъа себеплик этиу соруула сюзюлгендиле.
Магъаналы темаладан бирича, Казбек Валерьевич Къабарты-Малкъарда иш хакъны кётюрюуню белгилегенди. Экономиканы айнытыу министерствосу билдиргеннге кёре, КъМР-де 2020 жылны биринчи жыл жарымында эсеплеге таянып айтханда, орталыкъ айлыкъ 29 минг сом болгъанды, ол Россей Федерацияда кёрюмдюледен 40 процентге азыракъды. Аны бла бирге айлыкъны ёсюуюню терклиги орта россей кёрюмдюледен бийигирекдиле. Алай, кенгешде белгилегенлерича, ол азды.
Экономикада жангы тирилик, жангы проектле изленедиле, бек азындан, орта россей кёрюмдюлеге чыгъаргъа керекбиз», - деп чертгенди регионну оноучусу. Ол жаны бла тынгылы сюзюу изленнгенин, урунуу ючюн тёлеуледе тюрлениуле кийирирге тийишлисин, тёрели болмагъан оноула керек болгъанларын белгилегенди.
Сёлешиуню энчи темасы бюджет бёлюмню ишчилерини айлыкълары болгъанды: «Ол ишлегенлени  асламлыгъыды, социал сорууду. Устазланы, маданиятда, спортда, саулукъ сакълауда уруннганланы алгъан ахчалары бюгюннгю кюннге келишмейди», - дегенди Казбек Коков. Кенгешни эсеплерине кёре, КъМР-ни Правительствосуна республикада урунуу хакъны тёлеу системасын игилендириу жаны бла тийишли проект хазырларгъа буюрулгъанды.
Повестканы сорууларына кёре, КъМР-ни Правительствосуну Председатели Мусукланы Алий, КъМР-ни экономиканы айнытыу министри Рахайланы Борис, КъМР-ни урунуу эм социал къоруулау жаны бла министри Асанланы Алим, КъМР-ни финансла жаны бла министри Елена Лисун, КъМР-ни жарыкъландырыу, илму эм жаш тёлюню ишлери жаны бла министрини къуллугъун толтургъан Анзор Езаов, КъМР-ни саулукъ сакълау жаны бла министри Рустам Калибатов, КъМР-ни маданият министри Мухадин Кумахов, КъМР-ни спорт министри Ислам Хасанов докладларын окъугъандыла.