Бу кюнледе Къабарты-Малкъарда РФ-ни Къоруулау министерствосуну Тау хазырлау эм жанын къутхарыугъа юйретиу «Терскъол» базасыны мурдорунда  альпинизмден «Эльбрусское кольцо-2020» халкъла аралы эришиуле  къууанчлы халда жабылгъандыла эмда  хорлагъанла саугъаланнгандыла. Эришиуле таулада энчи буйрукъла толтургъан аскерчи бёлюмлени халкъла аралы оюнларыны чеклеринде къуралгъандыла. Къууанчлы ишге статс-секретарь - РФ-ни къоруулау министрини орунбасары Николай Панков, КъМР-ни Башчысы Казбек Коков, Россей Федерацияны Сауутланнган кючлерини физический хазырлау эм спорт управлениясыны башчысы  полковник Андрей Зыков, судьяла,  командаланы таматалары эмда аскерчиле къатышхандыла.
Саугъалау аскерчи-альпинист – Ата журтубузну къоруулаучусуну эсгертмесине гюлле салыу бла башланнганды. «Сизге Къабарты-Малкъарда жыйылгъаныгъыз ючюн ыразылыгъымы билдиреме эмда эришиуле бийик даражада бардырылгъанлары бла алгъышлайма, - дегенди Казбек Коков сёзюнде. – Быллай магъаналы иш бизни республикада бардырылгъаны бизге этилген ышаныулукъну белгисиди. Аны ючюн Россей Федерацияны Къоруулау министерствосуна ыразылыгъымы айтыргъа сюеме».
КъМР-ни Башчысы эришиуле къытханланы бла хорлатханланы ачыкъламагъанларын да белгилегенди: «Бек уллу хорлам – сиз биригип, бир биригиз бла ушакъла бардырыргъа, жангы шуёхла табаргъа, сынауугъузну кёргюзтюрге, профессионал шартларыгъызны ачыкъларгъа онг  болгъанындады. Быллай жумушла Россейде, битеу дунияда да мамырлыкъны, тынчлыкъны сакълауда артыкъда магъаналыдыла. Энтта бир кере алгъышлайма, жетишимле, саулукъ, насып тежейме»,-дегенди Казбек Коков.
Николай Панков а Аскерчи оюнла къыраллада сауутланнган кючлени араларында байламлыкъланы, ышаныулукъну кючлегенин белгилегенди.
Быйыл конкурсха Россейден эм Узбекистандан беш команда къатышханды. Эки ыйыкъны ичинде аскерчиле 15 энчи буйрукъну толтургъандыла, 100-километрлик марш бардыргъандыла, сегиз тау ауушдан аугъандыла, жети чырандан бла юч тау черекден ётгендиле. Эм магъаналысы уа Европаны эм бийик тауу Элбрусха ёрлегендиле.
Быйыл «Эльбрусское кольцо» эришиулени кубогун РФ-ни Хауа-десант аскерлерини командасы къытханды.  Экинчи жерге Узбекистанны аскерчилери чыкъгъандыла, ючюнчю уа Россейни Юг аскер  округуну командасы болгъанды.