Орта кюн Терс-Къолда Гара сууланы таласында Хорламланы паркы ачылгъанды. Къууанчлы ишге Къабарты-Малкъарны Башчысы Казбек Коков, «Россей – иги онгланы къыралы» организацияны таматасы Алексей Комиссаров, РФ-ни Экономиканы айнытыу министерствосуну келечиси, «Элбрусха ёрлеу» проектни эмда «Элбрус» клубну башчысы Татьяна Дьяконова, РФ-ни Энергетика министерствосуну ТЭК-ни айнытыу арасыны таматасы Олег Жданеев, «Россейни алчылары» конкурсну алчылары эм башхала къатышхандыла.
Бу ишни башларны аллында жыйылгъанла Бесланда терактда жоюлгъанланы бир минутну шош сюелип эсгергендиле. Ызы бла Казбек Коков къонакъланы бу ариу тийреде быллай магъаналы парк ачылгъаны бла алгъышлагъанды.
-Биз бай тарыхы, бай тёрелери болгъан деменгили къыралда жашайбыз. Кесибиз кёргенибизча, шёндюгю дуния бек терк тюрлене барады. Алай жамауатда хорламларыбыз, тарыхыбыз бла ёхтемленирге итиниулюк а чыртда таркъаймайды.
Бу парк комплекс да аланы сакълаугъа къошумчулукъ этеригине ышанама. Аны аты окъуна хорламланы баямлайды. Ала кёп тюрлю боладыла: бирлери тарых бла байламлы, башхалары инсанны энчи хорламы. Алай барыбызгъа да эм магъаналысы уа – Уллу Ата Журт урушда хорламды.
Бюгюнлюкде да къыралыбыз халкъла аралы террорчулукъ бла уруш бардырады. Кёп болмай пандемиягъа тюбегенбиз да, врачларыбыз кече-кюн демей аны бла кюрешиудедиле, алимле уа вакцина къурап тийишли жууап бергендиле. Дагъыда спортчуларыбызны къыралны атын махтау бла айтдыргъан хорламлары, сабийлерибизни жетишимлери да, - деп республиканы Башчысы паркны къураргъа оноу этгенлеге ыразылыгъын билдиргенди.
«Элбрус – Россейни, Европаны да эм бийик тёппесиди. Анга ёрлерге итиннген хар кимге да ол арсарлыгъын неда къоркъууларын онглауну белгисиди. Саулай къыралны хорламы да ма аладан къуралады», - дегенди Алексей Комиссаров. «Элбрус» клубну башчысы Татьяна Дьяконова уа къайсы жетишимге да игилик, ахшы ишле жаны бла багъа берирге чакъыргъанды: «Адам не къадар кёп иги иш этсе, берсе, ич дуниясы ол къадар бай бола барады. Паркны къурау жаны бла огъурлу ишни къолгъа алгъанла сау болсунла».
Алгъышлау сёзлерин РФ-ни Жигити, лётчик-космонавт Сергей Рязанский, Минги таугъа алгъаракъда ёрлеген 83- жыллыкъ Жаппуланы Рамазан, «Россейни алчылары» конкурсну талай финалисти да айтхандыла. Ызы бла къонакъла бары да тауну паркны ортасында ишленнген белгисине эсгериу тасмачыкъла къысып, аллында суратха тюшгендиле.
Айтханыбызча, Хорламланы паркы Гара сууланы таласында ишленнгенди. Анда къайын эмда назы терекле, жабышмакъ, наныкъ, муркку юлкюле, гюлле да орнатылгъандыла.
Омарланы Мурат.
