Арт жыллада Нальчикде тротуарлагъа эмда жаяу жюрюгенле аслам болуучу тийрелеге тийишлисича эс бурулмай тургъанды, дейдиле шахарны мэриясында. Сёзсюз, гражданланы жанындан аны бла байламлы кёп тарыгъыула эшитирге тюшгенди. Аны себепли администрация тийишли муниципал программа жарашдырып, былтыр мадар этип тебирегенди.
Быйыл жангы жамауат тийреле къурау эмда орамлагъа ремонт этиу бла бирге тротуарланы жангыртыу да барады. Шахарчыланы оюмларын эсге алып, эм биринчиден, къалайда мадар этиллиги белгиленнгенди. Алай бла бюгюнлюкде Шогенцуков атлы проспектде, Ахохов эмда Ватутин орамлада иш къазауатда барады. Къурулушчула тротуарлада бордюрланы алышырыкъдыла эмда жангыдан асфальт жаярыкъдыла. Кёзлери осал кёрген адамлагъа таплыкъгъа деп Ахохов орамда уа энчи плитка салынырыкъды.
Бу иш бла бирге шахарда дагъыда велосипедде учаргъа сюйгенлеге деп тийишли инфраструктура къурала турады. Мэрияны специалистлери айтханларына кёре, аллай жолчукъ быйыл Шогенцуков атлы проспектде да боллукъду. Арт кезиуледе уа аладан бир ненчасы ишленирикди.
Шахарны администрациясында ахшы умутларында нальчикчиле да болушурла деп ышанадыла, оюмларын социальный сетьледе #мэриивработу деген белги салып билдирирге чакъырадыла. Аны юсюнден дагъыда dialogsmerom@mail.ru электрон почтагъа жазып билдирирге боллукъду, дейдиле.
