Республиканы къурулуш, жашау журт-коммунал мюлк министри Алим Бербеков Нальчикде 52-чи номерли ясли блокну къурулушу къалай баргъаны бла жеринде шагъырейленнгенди. Ведомстводан билдиргенлерине кёре, анда 40 сабийге жерле боллукъдула.
Ала кеслери да ары эки къауумгъа бёлюнюп алай жюрюрюкдюле. Проектге тийишлиликде ясли битеу кереклиси бла жалчытылынырыкъды. Ол санда анда медицина эмда методика кабинетле, физкультура бла кюреширча зал да къураллыкъдыла.
Бюгюнлюкге объектде къурулуш-монтаж ишлени аслам кесеги тамамланнганды. Шёндю специалистле ичинде эмда тышында сюртюу-бояу бла кюрешедиле. «Строймонтаж-3» подряд организацияны келечилери айтханларына кёре, ясли проектинде белгиленнген заманындан алгъа битерикди. Ол а быйылны ахырына дери боллукъ ишди.
Объектни къурулушу «КъМР-де билим бериуню айнытыу» къырал программаны эмда «Тиширыуланы иш бла жалчытыугъа себеплик этиу - юч жыллары толмагъан сабийлеге школгъа дери билим бериу жаны бла онг къурау» федерал проектни чеклеринде бардырылады.