Гитчелени къоркъуусузлукъларын сакълау – абаданланы баш борчларыды, аны ючюн школлада устазлагъа бла юйретиучюлеге да уллу жууаплылыкъ салынады. Аланы бу жаны бла хазырлылыкълары уа МЧС-ни регионда бёлюмю бардыргъан сынау-профилактика ишлерини кезиулеринде тинтиледи.
Окъуу жылгъа хазырланыу мероприятияларыны чеклеринде ведомствону келечилери Нальчикни 60-чы номерли сабий садында болгъандыла. От тюшюуге къажау службаны инспекторлары мекямда къыйын болумгъа къоркъуусузлукъ жалчытыу излемле къалай толтурулгъанларына къарагъандыла, от тюшгенини юсюнден билдирген сигнализацияны ишлетип кёргендиле, эвакуация жолланы, жаннганны ёчюлтюрча суу ызланы халларын сюзгендиле.
Дежурный караул от ёчюлтюучю техника къалай ишлегенине, от тюшгенде отоуну ичинде къалгъан адамны къалай къутхаргъанына тюшюндюргенди. Ахырында устазла бла инструктаж бардырылгъанды. Сабийле уа къонакълагъа концерт хазырлагъандыла, от тюшюуге къоркъуусузлукъну жалчытыудан билимлери бла къууандыргъандыла.
Тюбешиу юйрениу эвакуацияны бардырыу бла бошалгъанды, аны кезиуюнде юйретиучюле сабийлени жана тургъан мекямдан къалай чыгъарлыкъларын кёргюзтгендиле. Устазла, гитчеле да МЧС-ден грамотала бла саугъаланнгандыла.