Казбек Коков «контроль сагъатны» чеклеринде Къабарты-Малкъарны Правительствосуну къаууму, толтуруучу къырал власть органланы башчылары бла кенгеш бардыргъанды. Анда сёз къырал жумушла бла жалчытыуну тап къурауну, аланы качестволарын игилендириуню юсюнден баргъанды.
Жыйылыугъа къатышханлагъа айланып, КъМР-ни Башчысы регионну толтуруучу къырал власть органларыны баш борчларындан бири къырал жумушла бла жалчытыуну бийик даражада къурау, аланы заманында эмда тынгылы толтуруу болгъанын эсгертгенди. Бюгюнлюкде 24 министерстводан бла ведомстводан 19-су 200-ге дери къырал жумушну толтуруу бла кюрешеди.
Республиканы оноучусу жангы коронавирус инфекция жайылгъанлы кёпле къыйын болумгъа тюшгенлерин айтып, аны бла байламлы Россейни Президенти къырал болушлукъну бир заманда да болмагъанча уллу мадарларын этгенин, ол санда тюрлю-тюрлю тёлеуле да тохташдыргъанын эсге салгъанды. Ол ишде аз да чыкъгъан тыйгъычла неда кемчиликле уа жамауатны тынгысыз этдиредиле. Саулай алып айтханда, бюгюнлюкде республикабызда 300 минг чакълы адам тюрлю-тюрлю социал тёлеуле алгъанлай турадыла, дегенди Казбек Коков.
Бюгюнлюкде Къырал эмда муниципал жумушланы бир порталында (ЕПГУ) халкъны жумушларын толтургъан организацияланы юслеринден билдириуле салынадыла, ала дайым жангыртыладыла. Дагъыда административ жорукъла, марда эмда право актла да басмаланадыла. Республикада жашагъанла электрон халда 190-дан артыкъ жумушну тындырыргъа боллукъдула. Аны къой, ала кимлеге тюшгенлерин, къалай толтурулгъанларын да кёрюп, билип турур онглары бардыла. 2017 жылда Къабарты-Малкъар «Мультирегиональность ЕПГУ» федерал проектге къошулгъанды. Ол а не къадар кёп жумушну электрон амал бла тамамларгъа онг береди. Быйылны 10 августуна ЕСИА-да да 674,16 минг адам эсепдеди.
Росстатны тергеулерине кёре, КъМР-де къырал жумушларын толтурур ючюн Интернетни хайырланнганланы саны 2019 жылда 79,3 процентни тутханды. СКФО-ну субъектлерини араларында Къабарты-Малкъар биринчи жерни алады. СКФО-да ол кёрюмдю 63, 6 процентди, РФ-да уа – 77,6.
Ахырында КъМР-ни Башчысы къырал эмда муниципал жумушланы тынгылы тамамлау, ведомстволаны араларында ол жаны бла бирге ишлеуню къыйматын кётюрюу къаллай уллу магъананы тутханын эсгертгенди. 3-7-жыллыкъ сабийлеге, ишсизлеге пособияла тёлеу бла байламлы оноуланы толтурургъа кереклисин чертип айтханды.
Кенгешни кезиуюнде КъМР-ни экономиканы айнытыу министри Рахайланы Борис, урунуу эмда социал къоруулау министри Асанланы Алим, эл мюлк министри Хасан Сижажев сёлешгендиле.
