КъБР-м и Правительствэм и Унэм щекIуэкIащ ди республикэм коррупцэм щыпэщIэтынымкIэ лэжьыпхъэхэм ятеухуа семинар.
Абы хэтащ КъБР-м Экономикэ, жылагъуэ шынагъуэншагъэмкIэ и советым и секретарь Тату Къазбэч, КъБР-м и Iэтащхьэм и администрацэм коррупцэм пэщIэтыным пыщIа IуэхухэмкIэ и управленэм и унафэщI Нэгъуей Аслъэн, абы и къуэдзэ Тюбеев Амырхъан, УФ-м ЮстицэмкIэ и министерствэм и Управленэу КъБР-м щыIэм и къудамэм и унафэщI Махуэ Марьянэ, КъБР-м и прокуратурэм коррупцэм пэщIэтынымкIэ законодательствэр зэрагъэзащIэм кIэлъыплъынымкIэ и къудамэм и унафэщI Жамырзэ Артур, КъБР-м и Iэтащхьэм и Администрацэм коррупцэм пэщIэтыным пыщIа IуэхухэмкIэ и управленэм и чэнджэщэгъу Кошенбаевэ Танзиля, зыхуэфащэ министерствэхэмрэ ведомствэхэмрэ, щIыпIэ унафэхэр зезыгъакIуэ органхэм я лIыкIуэхэр.
Тату Къазбэч тепсэлъыхьащ къэрал, муниципальнэ IуэхущIапIэхэм корупцэм щыпэщIэтынымкIэ къэув къалэн нэхъыщхьэхэм, ахэр гъэзэщIа хъун папщIэ УФ-м и хабзэ мардэхэр къэгъэсэбэпыным хэлъ къыхэщхьэхукIыныгъэхэм, апхуэдэу 2018 - 2020 гъэхэм Коррупцэм пэщIэтынымкIэ лъэпкъ планым и Iуэхугъуэ нэхъыщхьэхэм. Экономикэ, жылагъуэ шынагъуэншагъэмкIэ советым и секретарым къигъэлъэгъуащ зытепсэлъыхь Iуэхум егъэщIылIа зыхуэфащэ хабзэ мардэхэр республикэм зэрыщызэтеувар, апхуэдэу «Коррупцэм пэщIэтыныр» программэ къуэдзэр зэрыщагъэзащIэр.
А лэжьыгъэ дыдэр КъБР-м зэрыщекIуэкIыр зэпкърыхауэ къигъэлъэгъуащ Нэгъуей Аслъэн.
Жамырзэ Артур зэрыжиIамкIэ, прокуратурэм и органхэм къыщIагъэщащ иужьрей зэманым законодательствэр ди деж 1538-рэ къызэрыщызэпаудар. Абы папщIэ жэуапым ирашэлIащ IэнатIэ зэмылIэужьыгъуэхэр езыхьэкI къулыкъущIэу 478-рэ. А къэпщытэныгъэм ипкъ иткIэ уголовнэ Iуэхухэр къызэIуахын папщIэ тхыгъэу 28-рэ следствием и органхэм хуагъэхьащ.
Дызэрыт илъэсым и япэ мазихым къриубыдэу «КъБР-м хабзэр къыщызэпауд къэмыгъэхъунымкIэ, жылагъуэ хабзэмрэ жылагъуэ шынагъуэншагъэмрэ гъэбыдэнымкIэ щызэфIэгъэкIыпхъэхэр» къэрал программэм «Коррупцэм пэщIэтыныр» и программэ къуэдзэр гъэзэщIэнымкIэ зэфIагъэкIахэм тепсэлъыхьащ Тюбеев Амырхъан.