КъМР-ни Парламентини президиумуну кезиулю жыйылыуун спикер Татьяна Егорова бардыргъанды Депутатла законла чыгъарыучу органны кезиулю кенгешин 23 апрельде бардырыргъа оноу этгендиле.
«Билим бериуню юсюнден» республикалы законну 10-чу статьясына тюзетиуле сюзюлгендиле. Законопроект федерал излемлеге келишдирилгенди. Сёз саулукъларына кёре чекленнген онглары болгъан школчуланы окъутуу юйлеринде бардыргъан кезиуде аланы жылы аш-суу бла жалчытыуну низамыны эмда бу себепликни ахча бла тёлеуге алышыуну юсюнден баргъанды.
«КъМР-де турист ишни юсюнден» республикалы законну 4-чю эм 5-чи статьяларына тюзетиулеге да къаралгъанды. Ол «РФ-де турист ишни мурдоруну юсюнден» эмда РФ-ни бир-бир законларына тюзетиуле кийириуню юсюнден» 63-ФЗ номерли федерал закон кючюне киргени бла байламлы хазырланнганды. Ол инструкторла-проводниклени ишлерин бир низамгъа келтирир мурат бла жарашдырылгъанды. Законопроектде республиканы Правительствосуна бла Курортла эм туризм министерствосуна экскурсияланы бардыргъанланы, гидле-тилманчланы эм инструкторла-проводниклени ишлерине къырал контроль тамамлау жаны бла жууаплылыкъла белгиленнгендиле.
Белгиленнген законну «КъМР-де туризм жаны бла толтуруучу къырал власть органны жууаплылыкълары» деген 5-чи статьясына жангы пункт къошулады. Анда уа КъМР-де турист маршрутланы энчи ашырылыргъа тийишли маршрутлагъа къошууну, аланы юслеринден шартланы интернетде официальный сайтда басмалауну юсюнден жазылады.
Депутатла федерал законланы уллу къауумун сюзгендиле. Алада Жашау журт, Урунуу, Агъач кодекслеге тюзетиуле белгиленнгендиле. Къыралны регионларында законла чыгъарыучу органларыны башламчылыкъларына да къаралгъанды
Президиумну келечилери тюрлю-тюрлю сфералада жетишимле болдургъанланы КъМР-ни Парламентини Сыйлы грамотасы бла саугъалауну юсюнден оноу этгендиле.
«Тюрлю-тюрлю соруула» бёлюмде Урунуу, социал политика эм саулукъ сакълау комитетини башчысы Хусейн Кажаров КъМР-ни Парламентини «Энчи аскер операциягъа къатышханлагъа бла аланы юйюрлерине социал болушлукъну мадарларыны юсюнден» бегиминде белгиленнген эсгертиуле къалай толтурулгъанларын билдиргенди.
КъМР-ни Парламентини пресс-службасы
