Кёп болмай «Россельхозцентр» учрежденияны Къабарты-Малкъарда бёлюмюню специалистлери Чегемде «ЭКО-КУЛЬТУРА» биригиуню   теплицасында болгъандыла.

Комплексни баш агроному Мухамед Бекалдиев коллегаларына томатланы къалай тюрлю ёсдюргенлерини, ол санда заранлы къурт-къумурсхадан бла аурууладан къоруулагъанларыны  юсюнден да толу хапар билдиргенди.  Эл мюлк араны келечилери Macrolophus pygmaeus энтомофагланы хайырланыугъа аслам эс бургъандыла. Быллай амал заранлы къуртладан химияны азыракъ салыргъа болушады. Аны себеплиги бла томатха заран жетдирген къурт-къумурсханы иги кесегин къурутургъа онг табылады.  

Эл мюлк араны келечилери кеслеринде этилген эм чыгъарылгъан биопрепаратланы, энтомофагланы юсюнден да хапарлагъандыла.  Ахырында байламлыкъда ишлерге, бир бирге сынамларындан билдирирге келишгендиле. 

Бизни корр.