Хамэ къэралхэм ящыщу Къэбэрдей-Балъкъэрым сату нэхъыбэу зыдищIыр СНГ-м хэтхэращ икIи иужьрей илъэситIым къриубыдэу республикэм зэригъэкIуэкIа продукцэм и куэдагъым процент 25-кIэ хигъэхъуащ, жиIащ иджыблагъэ КъБР-м Экономикэ зыужьыныгъэмкIэ и министерствэм маркетингымрэ къэрал щIыб зэпыщIэныгъэхэмкIэ и Департаментым и унафэщI Богацкая Севиль.

«Иужьрей илъэситIым дриплъэжмэ, хамэ къэралхэм ядэтщIа сатум фейдэуэ къыдитым и куэдагъым процент 26,5-кIэ хэхъуащ, яхуедгъашэмкIэ - процент 31,1-кIэ, нэгъуэщI хэкухэм къитшымкIэ – процент 23,8-кIэ. Иужьрей илъэсипщIым КъБР-м хамэ къэралхэм ядищIа сатум кърикIуа бжыгъэхэр нэхъыбэ дыдэ 2023 гъэм хъуащ», - къыхигъэщащ Богацкэм.

Илъэс блэкIам республикэм и IуэхущIапIэу къэрал щIыб-экономикэ Iуэхугъуэхэм хэтахэм ирагъэкIуэкIа сатум проценти 7-кIэ къыхагъэхъуащ 2022 гъэм елъытауэ – экспортымкIэ проценти 3-кIэ, импортымкIэ – проценти 8,3-кIэ.

«Зэрынэрылъагъущи, къэралым къращIылIа дэкъузэныгъэ зэмылIэужьыгъуэхэм щхьэкIэ къэмынэу, республикэм и IуэхущIапIэхэм сату зыдащI къэралхэм къыхагъахъуэ зэпытщ, псом хуэмыдэу, лъэныкъуитIми фейдэ къыхахыу, ди ныбжьэгъу къэралыгъуэхэм», - жиIащ министерствэм и лэжьакIуэм.

Къэбэрдей-Балъкъэрым ираш и продукцэм и процент 70-р СНГ-м хэт къэралхэм яIэрохьэ. Абы хохьэ Белоруссиер (процент 14,7-рэ),  Къэзахъстаныр (14,6-рэ), Узбекистаныр (12,3-рэ), Ермэлыр (9,9-рэ), Къыргъызыр (9,6-рэ). Мыдрейуэ, Куржым процент 15,5-рэ, Ираным - 5,1-рэ яхуозэ. Апхуэдэуи ди продукцэхэр иращэ Монголием, Тыркум, Афганистаным, Китайм.

Республикэм и продукцэм щыщу хамэ къэралхэм хурагъашэм и нэхъыбэр ерыскъыхэкIхэрщ. Экспортым ягъакIуэм и процент 60-р абыхэм къалъос. КъБР-м ираш жылапхъэ, IэфIыкIэхэкIхэр, кхъуейхэкIхэр, фадэрэ псыхэкIрэ, нартыху крахмал, Iусыпхъэ, нэкулъ, фIэIугъэ теIуэнтIахэр, нарзаныпс.

«Ди ныбжьэгъу хэкухэм яхудиIэ къэрал щIыб-экономикэ зэпыщIэныгъэхэр егъэфIэкIуэным ехьэлIауэ УФ-м и Президентым ищIа унафэм дытету долажьэ. 2020 гъэм елъытауэ экспорт дгъакIуэ ерыскъыхэкIым, нэгъуэщI продукцэхэри яхэту, я куэдагъыр процент 70-м нэдгъэсыну 2023 гъэм къытпэщылъщ», - къыхигъэщащ департаментым и унафэщIым.

                                               ХЬЭЩОКЪУЭ Алыдж.